Энэ онд 100 жилийн ой нь тохиож буй Дашбалбар сумын “Буриад өв соёлын музей”-тэй танилцлаа. Буриадын 11 овгийн туг, бэлгэдлийг дүрсэлсэн архитектурын шийдэлтэй уг музей шинэ оны босгон дээр ашиглалтад оржээ.
БНМАУ-ын нам, төрийн зүтгэлтэн, МАХН-ын Улс төрийн Товчооны гишүүн, Сайд нарын Зөвлөлийн орлогч дарга асан Дамдинжавын Майдар, Төр, нийгмийн нэрт зүтгэлтэн, УИХ, Засгийн газрын гишүүн, Дэд бүтцийн сайд асан Санжаасүрэнгийн Зориг, Монгол Улсын Ардын зураач, Урлагийн гавъяат зүтгэлтэн Гэлэгийн Одон, Монгол Улсын Ардын жүжигчин, профессор Дэмбэрэлийн Жаргалсайхан нараас үргэлжлээд Дашбалбар сумаас олон алдартнууд төрөн гарчээ.
Дэлхийн буриад судлалын өв соёлын төв болох тус музейг Монгол Улсын Гавьяат барилгачин, тус сумын уугуул Н.Чойбалсангийн боловсруулан зураг төсвийн дагуу сумын орон нутгийн хөгжлийн сангийн хөрөнгө оруулалтаар гүйцэтгэсэн гэнэ.
Одоогийн байдлаар тус сумын “Орон нутаг судлах музей” нь буриад угсаатны түүх, өв соёлыг агуулсан 700 гаруй үзмэртэй бөгөөд болон сумаас төрсөн зураачдын эх бүтээл уран зургууд, буриад зоны ахуйн хэрэглэгдэхүүнүүдийг сумын 100 жилийн өмнө дэглэн үзэгч олны хүртээл болгох юм.
Энэхүү музей нь буриад өв соёл судлалын музей гэдгээрээ дэлхийд анхдагч бөгөөд Монгол улс, БНХАУ, ОХУ болон бусад улс оронд тархан суурьшсан буриад угсаатны өв соёлын томоохон төв болох зорилготой юм.
