Төрийн хэмнэлтийн тухай хуулийн дагуу Эвт худалдааны төвд байрлах Төрийн үйлчилгээний нэгдсэн төвийг аймгийн ЗДТГ-ын байр буюу хуучнаар Улсын бүртгэлийн хэлтсийн хуучин байранд нүүлгэн шилжүүллээ.
Учир нь Хурдан төв ашиглалтад орсонтой холбогдуулан олон байгууллагын үйлчилгээг нэг оператор үзүүлэх боломжтой болсноос шалтгаалж нэг цэгт байрлаж ажиллах албан хаагчдын тоо цөөрсөн, нөгөөтээгүүр ТҮНТ нь Эвт худалдааны төвийн 2 давхарт байрладаг тул хөгжлийн бэрхшээлтэй иргэд болон ахмад наснууд үйлчлүүлэхэд хүндрэлтэй байгаа талаар иргэдээс гомдол саналууд удаа дараа ирж байсантай холбоотойгоор нүүлгэн шилжүүлж байна.
Ингэснээр эдгээр иргэд маань төрийн үйлчилгээг тэгш хүртээмжтэй авч чадахаас гадна жил бүр түрээсийн төлбөрт төлдөг байсан 30 гаруй сая төгрөгийг хэмнэж байгаагаараа давхар ач холбогдолтой юм. Гэхдээ мэдээлэл хараахан аваагүй байгаа иргэдийг чирэгдүүлэхгүйн тулд Хурдан төвийн 1 оператор Эвт худалдааны төвөөс иргэдэд лавлагаа, үйлчилгээгээ үзүүлсээр байх юм.
