Хэнтий аймагт “Хүрээлэн буй орчны эсрэг, мал хулгайлах, мансууруулах эм, сэтгэцэд нөлөөт бодистой холбоотой гэмт хэрэг, зөрчлөөс урьдчилан сэргийлэх ажлын үр дүнг дээшлүүлэх нь” сэдэвт зүүн бүсийн уулзалт, хэлэлцүүлэг зохион байгуулагдаж байна.
Зүүн бүсийн уулзалт, хэлэлцүүлгийг хүрээлэн буй орчны эсрэг, мал хулгайлах, мансууруулах эм, сэтгэцэд нөлөөт бодистой холбоотой гэмт хэрэг, зөрчлөөс урьдчилан сэргийлэх ажлыг эрчимжүүлэх, хамтын ажиллагааг сайжруулах чиглэлээр санал солилцож, бодит үр дүнд хүрэх арга замуудыг тодорхойлох зорилгоор Монгол Улсад ГХУСАЗЗ, ЦЕГ-ын Хар тамхитай тэмцэх алба, Эрүүгийн цагдаагийн албаны Хулгайлах гэмт хэрэгтэй тэмцэх хэлтэс, Экологийн цагдаагийн албаны Хүрээлэн буй орчны эсрэг гэмт хэрэг мөрдөн шалгах хэлтэс, Ургамал хамгааллын эрдэм шинжилгээний хүрээлэн, Дэлхийн байгаль хамгаалах сангийн Монгол дахь хөтөлбөрийн газрын Зүүн бүсийн салбар болон Хэнтий, Дорнод, Сүхбаатар, Дорноговь аймгуудын Гэмт хэргээс урьдчилан сэргийлэх ажлыг зохицуулах салбар зөвлөл хамтран зохион байгуулж байна.
Уулзалт, хэлэлцүүлгийг нээж Хэнтий аймгийн ИТХ-ын дарга бөгөөд АГХУСАЗСЗ-ийн дарга Б.Цогт-Орших үг хэлж, аймгийн Засаг дарга Д.Аюурбунь, Жендэрийн үндэсний хорооны Нарийн бичгийн дарга А.Адилбиш нар мэндчилгээ дэвшүүлсэн бөгөөд хэлэлцүүлэгт дээрх аймгуудын аймагт ГХУСАЗСЗ-ийн бүрэлдэхүүн, Прокурорын газар, Цагдаагийн газар, Байгаль орчны газар болон Хүнс, Хөдөө аж ахуйн газрын холбогдох 60 гаруй албан хаагчид оролцож байна.
Энэхүү уулзалтаар хүрээлэн буй орчин, мал хулгайлах, мансууруулах эм, сэтгэцэд нөлөөт бодистой холбоотой гэмт хэрэг, зөрчлөөс урьдчилан сэргийлэх чиглэлийн мэдээлэл, танилцуулга болон оролцогчдын дунд хэлэлцүүлэг болох юм.
