Төрийн албан хаагчдын нийгмийн баталгааг хангах хөтөлбөрийн хүрээнд аймгийн Засаг даргын ивээл дор төрийн захиргааны болон төрийн үйлчилгээний байгууллагуудын дунд “Асуудлаас шийдэлд” тэмцээн зохион байгуулах гэж байна.
Уг тэмцээнд аймгийн хэмжээнд үйл ажиллагаа явуулж байгаа төрийн захиргааны болон төрийн үйлчилгээний бүх байгууллага, байгууллагын албан хаагчдыг бүрэн хамруулах юм. Тэмцээн 2 үе шаттай бөгөөд эхний шатанд тухайн байгууллагын бүх албан хаагчид иргэдэд төрийн үйлчилгээг хүргэхэд гарч байгаа хүндрэл, иргэдийг чирэгдүүлж байгаа шалтгаан нөхцөлийг арилгах, бага зардлаар төрийн үйлчилгээг иргэдэд хүргэх, байгууллагын дотогш чиглэсэн тулгамдаж буй асуудлыг шийдэх, байгууллагын чиг үүргийн хүрээнд шинэ санал санаачилга гаргах гэх мэт асуудлаа тодорхойлох бөгөөд хоёрдугаар шатанд байгууллагууд тодорхойлсон асуудлын шийдлийг үйл ажиллагаандаа буюу практикт туршин хэрэгжүүлж үр дүнд хүрсэн байхаар тусгажээ.
Мөн гэрийн даалгавар биелүүлэх бөгөөд энэ нь нийгмийн баталгааны хүрээнд байгууллага бүр нэг албан хаагчийг сонгож, амьдрах орчныг сайжруулах сайн үйлсийн ажлыг зохион байгуулах юм.
Тэмцээнд 3 дугаар сарын 1-ээс 9 дүгээр сар хүртэл үргэлжилж, шалгарсан байгууллагуудыг дараах байдлаар шагнана. Үүнд Тэргүүн байр 10,00 сая төгрөг, Дэд байр 8,0 сая төгрөг; Гутгаар байр 3-ыг шалгаруулах бөгөөд тус бүр 5,0 сая төгрөг, гэрийн даалгаврын оноогоор хамгийн өндөр дүгнэгдсэн 5 багт тус бүр 1,0 сая төгрөг буюу нийт шагналын сан нь 38,0 сая төгрөг олгох юм.
