УИХ-ы гишүүн Ц.Идэрбат: 2022 оны хавраас эхлэн анх төрийн анхан шатны нэгж багт ажиллаж иргэдийнхээ амьдралд дунд нь орж, аливаа асуудлыг тэдний нүдээр харж үзэн УИХ-аас баталсан хууль хөрсөн дээр, хөдөөдөө хэрхэн бууж байгаа талаар судалсан. Улмаар Хэнтий аймгийн 89 багт хүрч иргэдийн санал хүсэлт, туршлагадаа үндэслэн хууль тогтоох байгууллагад аливаа асуудлыг дэвшүүлж хуулийн хийдэл, оновчгүй зүйл заалтыг өөрчлөх, дутагдалтай шаардлагатай асуудлыг нэмж оруулахаар хичээж ажилласан. Тэгвэл 2024 оны сонгууль бүсчилсэн байдлаар явагдаж, эргэх холбоо багийн уулзалт хүрээгээ тэлж зүүн гурван аймгийн 195 багт бид иргэддээ хүрч ажиллаж байна. Халх, Буриад, Хатагин, Дарьганга, Үзэмчин, Барга гээд олон Монголчуудынхаа зан заншил, харилцаа соёлоос суралцаж тэднийхээ санал бодлыг сонсож, нийтлэг асуудлыг эрэмбэлсэн үр өгөөжтэй уулзалтууд үргэлжилж байна. Хаврын чуулганаар хэлж ярих, дэвшүүлэх олон асуудлаа ч эмхэлж явна хэмээн цахим хуудастаа нийтэлжээ.
