Хэнтий аймгийн Бор-Өндөр сум сүүлийн өдрүүдэд төрийн албан хаагчид болон багуудынхаа иргэдийн дунд төрөл бүрийн спортын тэмцээнийг шат дараатай зохион байгуулж, иргэдийг биеийн тамир, спортоор идэвхжүүлэх ажлыг эрчимтэй хэрэгжүүлсээр байна.
Энэ удаад Хүйх 5-р баг болон Өлгий 6-р баг хамтран спортын өдөрлөг зохион байгуулж, багийнхаа авьяаслаг, идэвхтэй иргэдийг сорин өрсөлдүүлж, шилдгүүдээ тодрууллаа.
Шагналыг сумын удирдлагууд гардуулан өгч, оролцогчиддоо баяр хүргэсэн бөгөөд тэмцээнийг Өлгий 6-р багийн Засаг дарга Н.Отгонбилэг, 5-р багийн Засаг дарга Б.Мөнх-Оргил, Э.Гуамарал нар хамтран зохион байгуулжээ.
Мөн спортын өдөрлөгийг “Си Эм Кэй Ай” ХХК, БИНХ-ын дарга С.Мягмаржав нар ивээн тэтгэж, багийн спортын амьдралд бодит дэмжлэг үзүүлсэн байна.
