Өнөөдөр Хэнтий аймгийн Хэрлэн суманд 11 дүгээр цэцэрлэгийн барилга ашиглалтад орж, нээлтийн ажиллагаа боллоо.
Уг барилга нь хуучнаар яслийн байр байсан газарт шинээр баригдсан бөгөөд 120 ортой цэцэрлэг юм. Энэхүү төслийг тойргийн гишүүн, Монгол Улсын Ерөнхий сайд Л.Оюун-Эрдэнэ, УИХ-ын гишүүд Б.Бат-Эрдэнэ, Ц.Идэрбат нар санаачлан 2024 оны улсын төсөвт 3.1 тэрбум төгрөгийг тусгуулснаар хэрэгжиж эхэлжээ.
Анх 1960 оны 12 дугаар сард “Хэнтий аймгийн 1 дүгээр ясли” нэртэйгээр Эрүүлийг хамгаалах газрын харьяанд байгуулагдаж байсан энэхүү байгууллага тухайн үед 65 хүүхэдтэй, өлгий, мөлхөө, ахлах гэсэн гурван бүлэгтэй, 19 ажилтантай үйл ажиллагаагаа эхлүүлж байжээ.
Харин эрх зүйн өөрчлөлттэй холбоотойгоор яслийн статус хүчингүй болж, өнөөдөр орчин үеийн стандарт хангасан “Хэрлэн сумын 11 дүгээр цэцэрлэг” нэртэйгээр шинэчлэгдэн ашиглалтад орж байна.
Ингэснээр Хэнтий аймаг нийт 35 дахь цэцэрлэгээ ашиглалтад оруулж, сургуулийн өмнөх боловсролд хамрагдалтын түвшин 95 хувьд хүрлээ. Сүүлийн таван жилийн хугацаанд аймгийн хэмжээнд 20 гаруй шинэ болон өргөтгөл цэцэрлэг баригдаж, Хэрлэн сумын 1, 3, 5 дугаар цэцэрлэгүүдийн өргөтгөлийн ажил амжилттай хийгдээд байна.
