Дэлхийн зөн олон улсын байгууллага нь хүмүүнлэг, хөгжил, нөлөөлөл, яаралтай тусламжийн байгууллага ба төсөл, хөтөлбөрүүдээрээ дамжуулан нийгмийн эрсдэлт нөхцөлд амьдарч буй хүүхэд, гэр бүлийн тогтвортой сайн сайхан байдлыг нэмэгдүүлэхийг зорьж ажилладаг Дэлхийн 100 гаруй улсад салбартай олон улсын байгууллага юм. ДЗОУБ-ын Монгол дахь суурин төлөөлөгчийн газар нь 1996 оноос тус улсад үндэсний стратегийнхаа хүрээнд тогтвортой хөгжлийн 1,4,6,8,13,16-р зорилтуудад хувь нэмрээ оруулан төсөл, хөтөлбөрүүдээ хэрэгжүүлсээр байна.
Харин ДЗОУБ-ын Бор-Өндөр II орон нутгийн хөтөлбөр нь 2005 оноос эхлэн Хэнтий аймагт хүүхэд, гэр бүлийн сайн сайхан байдлыг хангахад чиглэсэн дараах төсөл, техникийн хөтөлбөрүүдийг хэрэгжүүлсэн байна. Үүнд:
– Хүүхэд ивээн тэтгэх хөтөлбөр
– Эрүүл мэндийн төсөл
– Боловсролын төсөл
– Хүүхэд хөгжил, хамгааллын хөтөлбөр
– Өрхийн амьжиргаа, даван туулах чадварыг нэмэгдүүлэх болон гамшгийн эрсдэлийг бууруулах зэрэг хөтөлбөрүүдийг тус тус хэрэгжүүлжээ.
Тэгвэл Хэнтий аймгийн хэмжээнд хэрэгжиж байсан ДЗОУБ-ын Бор-Өндөр II орон нутгийн хөтөлбөр нь 19 жилийн турш амжилттай хэрэгжиж, өнөөдөр ийнхүү “Хөгжилд тэмүүлсэн 19 жил”-ийн үр дүнгийн баяраа хийлээ. Хөтөлбөрийн хэрэгжилтийн хугацаанд 22.4 тэрбум төгрөгийн санхүүжилтийг орон нутагт оруулснаар нийт 4.158 өрхийн 13.306 хүүхэд, 10.470 насанд хүрэгчид төслөөс шууд үр шим хүртжээ.
Хаалтын баярын хүрээнд Хэрлэн 5 дугаар сургуульд мэдээлэл технологийн кабинет, ТЦС-ийн дотуур байранд хүүхэд хөгжил хамгааллын өрөө тохижуулахаас гадна зорилтот бүлгийн 10 өрхөд өргөө цагаан гэр бэлэглэлээ.
Мөн Хэнтий аймгийн Засаг дарга болон ДЗОУБ-ын Монгол дахь суурин төлөөлөгчийн газар хамтран санамж бичиг байгууллаа. Тус санамж бичгийн хүрээнд Бор-Өндөр II орон нутгийн хөтөлбөрийн Хэнтий аймагт хэрэгжүүлсэн олон төрлийн төсөл, арга хэмжээний арга аргачлал, үйл ажиллагааг цаашид тогтвортой үргэлжлүүлж болох юм.
