Хэнтий аймгийн Засаг дарга Ц.Чогсомжав Гурванбаян тосгонд ажиллалаа. Энэ үеэр тус тосгоны ерөнхий боловсролын сургуулийн их засвартай танилцсан юм.
Гурванбаян тосгоны сургууль нь 1986 онд ашиглалтад орсон бөгөөд энэ онд 433 сая төгрөгөөр сургуулийн дотор их засвар хийгджээ. Харин дотуур байр, гал тогооны байрны хувьд баригдаад 38 жил болж байгаа бөгөөд энэ хугацаанд ганц ч удаа шинэчлэгдэж, их засвар хийгдэж байгаагүй. Тиймээс дотуур байр, гал тогоог шинэчилж, их засвар шаардлагатай байгааг сургуулийн захирал Я.Сүхбаатар илэрхийллээ. Мөн багш нарыг амьдрах байраар хангах асуудал тулгамдаж байгааг онцолсон юм.
Хэнтий аймаг сүүлийн жилүүдэд боловсролын салбарт онцгойлон анхаарч сурагчдын сурах орчныг сайжруулах үүднээс шинээр сургууль, дотуур байрыг шат дараатай ашиглалтад оруулсаар байгаа. Үүнтэй холбоотойгоор Засаг даргын зүгээс эхний ээлжид шаардлагатай засварын зардлаа тооцоолоод өгөхийг үүрэг болголоо. Харин багш нарыг байраар хангах тал дээр цаашид баригдах сурагчдын дотуур байруудыг барихдаа нэг давхарт нь багш нарын байрыг давхар барина. Ингэснээр гаднаас ирж буй багш нарыг амьдрах орчин нөхцөл сайжирна гэж үзэж байгаа юм.
Мөн тус сургууль, дотуур байр, гал тогооны байруудад өнгөрсөн онуудад 178 сая төгрөгийн дээврийн их засвар, 412 сая төгрөгийн сантехникийн засвар хийгдэж байжээ.
