Иргэдийн оролцоот “Хэтийн Хэнтий” арга хэмжээ Батширээт суманд үргэлжилж байна. Тус арга хэмжээний хүрээнд нийгмийн даатгал, ГХБХБГ, улсын бүртгэлийн хэлтэс, мал эмнэлэг, цахим үйлчилгээний хэлтэс, нэгдсэн эмнэлэг зэрэг байгууллагуудын төлөөллүүд иргэдэд чиглэл чиглэлийнхээ дагуу төрийн үйлчилгээг хүргэж байна.
Тэгвэл Батширээт сумын 230 гаруй иргэн дээрх байгууллагуудын мэргэжилтнүүдээс өөрт хэрэгтэй төрийн үйлчилгээнүүдийг авсан бол 130 гаруй иргэн нэгдсэн эмнэлгийн эрт илрүүлэг, урьдчилан сэргийлэх үзлэг шинжилгээнд хамрагдлаа.
Харин Хэнтий аймгийн Засаг дарга Ц.Чогсомжав энэ үеэр Батширээт сумын иргэдтэй уулзаж цаг үеийн мэдээ мэдээлэл, тус суманд авч хэрэгжүүлж буй аймаг орон нутгийн бодлого шийдвэрийг танилцууллаа. Мөн уулзалтын төгсгөлд иргэдийн санал хүсэлтийг сонссон юм.
Иргэдийн зүгээс энэ жил хур бороо их орж буйтай холбоотойгоор гол усанд боогдож, автомашинаар зорчиход хүндрэлтэй байна. Иймд нэн түрүүнд Эгийн голын гүүрийг яаралтай шийдэхийг хүссэн юм.
Харин аймгийн даргын зүгээс төсвийн тодотгол хийх үеэр орон нутгийн эрсдэлийн санг нэмэгдүүлж, иргэдээс ирсэн санал хүсэлтийн дагуу эхний ээлжид сумдын үерийн далан, гүүрний асуудлыг шийдвэрлэхээр болсон талаар мэдээллээ.
