Хэнтий аймгийн ОБГ-ын дарга, хурандаа Ж.Эрдэнэбатаар ахлуулсан “Шар усны үерээс урьдчилан сэргийлэх болон малын сэг зэм устгалын ажлын явцад хяналт тавих” ажлын хэсэг Батноров суманд ажиллалаа.
Батноров сум 2023 оны жилийн эцэст 328.665 мал тоолуулсан. Гэвч энэ жил өвөлжилт хүндэрсэнтэй холбоотойгоор тус сумын нийт малын 18 хувь хорогдсон байна. Үүнтэй холбоотойгоор 31736 үхсэн малын сэг зэмийг устгах бөгөөд одоогийн байдлаар 54.2 хувьтай устгалын ажил үргэлжилж байгаа юм.
Сумын зүгээс сэг зэмийн устгалын ажлыг хурдан шуурхай зохион байгуулахад ажиллах хүч хамгийн тулгамдаж байгаа тул суманд байгаа ажилгүй 35 иргэнийг нэмэлтээр хамруулах хүсэлтэй байгаагаа илэрхийллээ. Харин тэдгээр иргэдийн 10 хүртэлх хоногийн цалин болох 12 сая гаруй төгрөгийг хөдөлмөр эрхлэлтийг дэмжих сангийн нийтийг хамарсан ажлын хүрээнд шийдвэрлэж өгнө гэдгийг ажлын хэсгийн гишүүн, ХХҮГ-ын дарга Э.Хонгорзул хэллээ.
Ажлын хэсгийн тухайд хяналт тавихаас гадна шар усны үерээс урьдчилан сэргийлэх бэлэн байдлыг хангах, мал амьтны сэг зэм устгалын ажлын явц дээр зөвлөн туслах, арга зүйн зөвлөгөө өгч ажиллаж байгаа юм. Мөн малын сэг зэмийн гэдсийг задалж устгалын цэгт хийх, Хэрлэн голын дагуух сэг зэмийг хурдан шуурхай татаж авахад анхаарч ажиллах, устгалын цэгт бөөгнүүлсэн малын тооны үнэн бодит байдалд анхаарах, Идэрмэг 5 дугаар багийн сэг зэмийн устгалд онцгойлон анхаарах, ой хээрийн түймрийн урьдчилан сэргийлэх ажлыг эрчимжүүлэх, МУ-ын шадар сайд болон аймгийн Засаг даргын бэлэн байдлын үзлэгт бэлтгэл бэлэн байдлыг хангах зэрэг үүрэг даалгаврыг Батноров суманд өглөө. Түүнээс гадна сумын төвийн хогны цэг дээр байрласан устгалын цэгийн стандарт туйлын хангалтгүй байгаа тул стандартыг мөрдөж, хангаж ажиллахыг анхаарууллаа.
