Монгол улсын засгийн газраас “Бүсчилсэн хөгжлийг дэмжих жил” болгон зарласан. Энэ хүрээнд зүүн бүсийн аймгуудад “Бүсчилсэн хөгжил-зүүн бүс” иргэдтэй хийх уулзалтын ажлын хэсэг ажилласаар байна.
Тодруулбал УИХ-ын гишүүн, Монгол улсын сайд, Олимп, нийтийн биеийн тамир, спортын үндэсний хорооны дарга Б.Бат-Эрдэнээр ахлуулсан ажлын хэсэг бүсчилсэн хөгжлийн үзэл баримтлалыг иргэдэд мэдээлэхээр Дорнод, Сүхбаатар, Хэнтий аймгийн сумдад ажиллаж байгаа юм. Ажлын хэсэгт УИХ-ын гишүүн, ХХААХҮ-ийн сайд Х.Болорчулуун, УИХ-ын гишүүн Ц.Идэрбат, Монгол улсын Ерөнхий сайдын Бүс нутгийн хөгжил хариуцсан зөвлөх У.Отгонбаяр, Дорнод аймгийн Засаг дарга бөгөөд Зүүн бүсийн зөвлөлийн дарга М.Бадамсүрэн, Сангийн сайдын зөвлөх Х.Алтай нар багтаж байна.
Тус ажлын хэсэг өнөөдөр \2023.04.08\ Чингис хотын иргэд болон төрийн албан хаагчидтай хийх уулзалтыг зохион байгууллаа. Энэ үеэр бүсчилсэн хөгжлийн үзэл баримтлал, УИХ, Засгийн газрын онцлог шийдвэр, хууль тогтоомж, ХХААХҮ-ийн салбар, ЭТТ-н хувьцаа, ногдол ашиг, Зүүн бүсийн зөвлөлийн үйл ажиллагааны талаар мэдээлэл хүргэсэн юм.
Зүүн бүсийн хувьд түүхэн аялал жуулчлал, тээвэр логистик, авто зам, үйлдвэр зэрэг дээр тулгуурлан хөгжинө гэдгийг ажлын хэсгийнхэн онцолж байлаа.
