Аймаг, орон нутгийн зүгээс 2016-2023 оны хүртэлх хугацаанд төрийн албан хаагчдын ажиллах орчин нөхцөлийг сайжруулахад анхаарлаа хандуулсаар ирсэн бөгөөд үүнд сургууль, цэцэрлэг, эрүүл мэндийн төв, соёлын төв, оффисын барилгууд зэрэг нийт 300 орчим төрийн байгууллагыг шинээр барих болон өргөтгөх, засварлах ажлуудыг хийсэн байдаг. Үүгээр дамжуулаад иргэдэд хүрэх төрийн үйлчилгээний чанар стандарт дээшлэхийн зэрэгцээ тэнд ажиллаж байгаа албан хаагчдын ажил нөхцөл сайжирч байгаа юм.
Тэгвэл 2023 оноос эхэлж төрийн албан хаагчдын нийгмийн баталгааг хангах хөтөлбөрийг аймгийн иргэдийн Төлөөлөгчдийн Хурлаар батлуулж, амьдрах орчныг нь сайжруулахад анхаарч байна.
Тухайлбал өнгөрсөн онд орон нутагт дутагдалтай байгаа хүний нөөцийг бүрдүүлэх, нийгмийн асуудлыг нь шийдвэрлэх зорилгоор нийтдээ 125 сая төгрөгийн шагналын сантай шилдэг багш, шилдэг сувилагч уралдаан зарласан. Энэхүү уралдаанд шалгарсан шилдэг багшийг 15 сая төгрөгөөр, шилдэг сувилагчийг 25 сая төгрөгөөр шагнаж, байр орон сууцтай болоход нь дэмжлэг үзүүлсэн юм.
Харин энэ жилийн хувьд төрийн албан хаагчдын нийгмийн баталгааг хангах хөтөлбөрийн хүрээнд Төрийн цэргийн болон хууль сахиулах байгууллагын албан хаагчдын дунд “Шилдэг залуу офицер, ахлагч” шалгаруулах тэмцээн, Төрийн захиргааны болон төрийн үйлчилгээний албан хаагчдын дунд “Асуудлаас шийдэлд” тэмцээн, Төрийн бүх албан хаагчдын дунд “Спортын арга хэмжээ”, Хууль эрх зүйн мэдлэгийг дээшлүүлэх “Нэг цаг нэмэх цэнэг” сургалт гэсэн 4 томоохон арга хэмжээг хэрэгжүүлж байна.
Эдгээр арга хэмжээнд Хэнтий аймагт үйл ажиллагаа явуулж байгаа 190 байгууллагын 4000 гаруй төрийн албан хаагчид хамрагдана.
Тэгвэл тус арга хэмжээг зохион байгуулснаар 190 төрийн албан хаагчийн амьдрах орчин сайжирч, 190 төрийн байгууллага иргэдэд төрийн үйлчилгээ хүргэхтэй холбоотой тулгарч буй асуудлаа практикт шийдэхээс гадна 190 төсвийн шууд захирагч байгууллагынхаа асуудлыг албан хаагчдаараа дамжуулж олж мэдэж, засаж сайжруулах юм. Мөн сургалт, спортын арга хэмжээгээр дамжуулан төрийн албан хаагчдын хууль, эрх зүйн мэдлэг дээшилж, төрийн албан хаагчдын чөлөөт цагийг зөв боловсон өнгөрч, хамтач уур амьсгал, багаар ажиллах чадвар нэмэгдсэн байна гэж зохион байгуулагчдын зүгээс үзэж байгаа юм.
