Өнөөдөр ХХААХҮЯ-ны дэд сайд М.Ганхүлэг, аймгийн Засаг дарга Ц.Чогсомжав, Хэрлэн сумын Засаг дарга бөгөөд Чингис хотын захирагч М.Шүрэнцэцэг, ХХААГ-ын дарга Ж.Энх-Амгалан нар Хэрлэн сумын 5, 7 дугаар багийн малчин өрхүүдийн өвөлжилт, хаваржилтын нөхцөл байдалтай танилцаж, санал хүсэлтийг нь сонслоо.
Мөн төр засгаас хэрэгжүүлж буй малчид руу чиглэсэн бодлого, шийдвэрийг танилцуулахаас гадна ХХААХҮЯ, УОК, аймгийн онцгой комиссын зүгээс сэтгэлийн дэм болгож өгч буй эрүүл мэндийн болон хүнсний багц, нэг шуудай хивэг, нэмнээ зэргийг хүлээлгэн өглөө.
Малчдын хувьд “Өөрсдийн нөөц бололцоогоороо өвөлжилтийн бэлтгэл байдлыг сайн хангасан хэдий ч малын хоргодол ихтэй, чанга өвлийг үдлээ. Тиймээс урин цагт өвс тэжээлээ сайн бэлтгэж, дулаан хашаа хороо барих нь чухал юм байна” гэдгийг хэлж байсан юм.
Байгалийн хадлан ховордсон үед аравтын системд орж, атаршсан талбайг эргэлтэд оруулан малын ногоон тэжээл тариалсан сайн туршлагыг өнгөрсөн жилүүдээс Цэнхэрмандал сумын малчид орон нутагтаа нэвтрүүлсэн. Тэр ч утгаараа тус сумын малчид энэ хүнд өвлийг хохирол багатай давж байна ч гэж ярьсан байдаг.
Тэгвэл малчид малынхаа ногоон тэжээлийг өөрсдөө тариалдаг энэхүү сайн туршлагыг бусад сумуудад хэрэгжүүлэх үүднээс эхний ээлжид атаршсан талбайн судалгааг гаргаж, дундын тоног төхөөрөмж, техникийн асуудлыг нь шийдэж өгөхөөр төрөөс 1 тэрбум төгрөгийг төсөвлөж, тендер зарлагдаж гэж байна.
Тиймээс малчдыг аравтын системд орж, айл өрхүүдийг нэгдэж, ногоон тэжээл тариалахыг удирдлагууд уриалж байлаа.
