Байгууллагын дарга нарын өргөтгөсөн хурал өнөөдөр боллоо. Тус хуралд сумдын Засаг даргын Тамгын газар цахимаар оролцсон юм. Хурлаар аймгийн Засаг даргын орлогч Л.Батсайхан АОК-ын Шуурхай штабын үйл ажиллагаа, зудын эсрэг авч хэрэгжүүлж буй хариу арга хэмжээний талаар, Санхүү төрийн сангийн хэлтсийн дарга С.Нямдаваа "Малчдадаа тусалъя" хандивын аяны талаар мэдээлэл өглөө.
Аймгийн Засаг даргын Тамгын газраас өнөөдөр байгууллагын дарга болон ажилчдын цаг бүртгэл, үйлчилгээний стандартад хяналт тавьж тус хурлаар танилцуулга хийсэн. Тэгвэл аймгийн Засаг дарга Ц.Чогсомжав агентлаг байгууллагын дарга нарт цаг бүртгэл, үйлчилгээний стандартад анхаарал хандуулж ажиллахыг анхаарууллаа.
Мөн аймгийн Засаг даргын Тамгын газрын дарга Ж.Гантулга Төрийн албан хаагчийн нийгмийн баталгааг хангах хөтөлбөрийн хүрээнд зохион байгуулж буй төрийн цэргийн болон хууль сахиулах байгууллагын алба хаагчдын дунд "Шилдэг офицер, ахлагч" шалгаруулах уралдаан, "Нэг цаг нэмэх цэнэг" сургалт, төрийн байгууллагын албан хаагчдын дунд "Асуудлаас шийдэлд" тэмцээн, Спортын олон төрөлт тэмцээний талаар нэгдсэн мэдээлэл өгч албан хаагчдыг идэвхтэй оролцуулахыг уриаллаа.
