Хэнтий аймгийн Засаг дарга Ц.Чогсомжав Хэрлэн сумын 5 дугаар багийн малчин О.Цолмонгийн хотоор орж, өвөлжилт хаваржилтын нөхцөл байдалтай танилцаж, санал хүсэлтийг нь сонслоо.
О.Цолмонгийнх 4 хүү, нэг охинтой. Биднийг очиход бага хүү болох ХААИС-д малын их эмчээр суралцаж буй 2-р курсийн оюутан Ц.Түвшинбаяр ээж аавдаа туслангаа, гэртээ дадлагаа хийхээр ирсэн байлаа. Тэрээр мэргэжлийнхээ дагуу сурч мэдсэн зүйлээ амьдрал дээр туршиж, улсаас олгосон улаан буудайг гэрийн нөхцөлд хөрсгүй тариалж ядарсан малдаа өгч байсан юм.
Хэдий өвөлжилтийн бэлтгэл бэлэн байдлыг сайн хангалаа гэж бодсон ч цас зуд, малын хоргодол ихтэй хүнд өвлийг давлаа, харин одоо үлдсэн хэдэн малаа сайн тэнхрүүлж, авч үлдэх нь чухал. Мөн оюутан хүү маань ирсэн нь их ажлын хажуугаар тус дэм болж байна гэдгийг гэрийн эзэгтэй Н.Сарангэрэл хэлж байсан юм.
Харин аймгийн Засаг даргын зүгээс эрэлттэй мэргэжлээр сурч байгаа тул хүү Ц.Түвшинбаярыг “Зөгийн үүр” хөтөлбөрт хамрагдаж, төлбөрөө 100 хувь даалгах боломж байгаа гэдгийг онцлон хэллээ.
