Зудын эсрэг хариу арга хэмжээ авах, малчдад тусламж, дэмжлэг үзүүлэх зорилгоор олон ажлууд хэрэгжүүлж буй. Үүний нэг нь “Малчдадаа тусалъя” хандивын аян билээ. Өнөөдрийн байдлаар хандивын дансанд 26.8 сая төгрөг төвлөрөөд байна. Хандивын мөнгийг малчдад өвс, тэжээлийн дэмжлэг хүргэх ажилд зарцуулахаар шийдвэрлэж гүйцэтгэж ажиллахыг Хүнс, хөдөө аж ахуйн газарт даалгалаа.
Мөн аймгийн Онцгой комиссоос Дорнод аймгийн Матад сумаас 25 мянган боодол өвс татан авч сумдад 50 хувийн хөнгөлөлттэй үнээр олгосон. Уг дэмжлэгт Биндэр, Дэлгэрхаан сум хамрагдаагүй. Тэгвэл Хэнтий аймаг дахь түүхий эд бэлтгэгчдийн холбооноос хандивласан 800 боодол өвсийг Биндэр суманд, Гандантэгчэнлин хийдийн тэргүүн хамба, Наро банчэн гэгээнтэн нарын хандивласан 400 боодол өвсийг Дэлгэрхаан сум, Улаанбаатар хот дахь иргэнээс хандивласан 400 шуудай хивгийг Хэрлэн суманд олгохоор тус тус шийдвэрлэлээ.
