Ерөнхийлөгчийн Хөдөө аж ахуй, хөдөөгийн хөгжил хариуцсан зөвлөх З.Мэндсайхан, Аюулгүй байдал батлан хамгаалах бодлого хариуцсан бодлогын зөвлөх Д.Баасандамба болон аймгийн Засаг даргын орлогч Л.Батсайхан, ОБГ-ын дарга Ж.Эрдэнэбат нар өнөөдөр Галшар суманд ажиллан өвөлжилтийн нөхцөл байдалтай танилцаж, иргэдтэй уулзалт хийлээ.
Тус сум нь 2023 оны жилийн эцэст малчин болон мал бүхий 667 өрхийн 346.3 мянган толгой мал тоолуулжээ. Гэвч зудын улмаас нийт малын 31.6 хувь буюу 111,254 толгой мал зүй бусаар хорогдоод байна Мөн 12 өрх хотоо харлуулжээ. Цасны зузаан нимгэн газарт 18-25см, хунгар газарт 70-120см байна. Тус сум нь зудын эрсдэлийг бууруулах хариу арга хэмжээнд одоогийн байдлаар нийт 54.1 сая төгрөгийг зарцуулаад байна. Цасанд боогдсон иргэдэд тусламж үзүүлэх, зам гаргах ажлын хүрээнд нийт 1503 км газарт зам гаргажээ.
Ерөнхийлөгчийн Тамгын газраас өнөөдөр Галшар суманд ТУУЛАХ ЧАДВАР САЙТАЙ TOYOTA HILUX МАРКИЙН АВТОМАШИН, 30 ТОНН ТЭЖЭЭЛ, ХҮНСНИЙ БОЛОН ЭРҮҮЛ МЭНДИЙН БАГЦ, ХӨДӨЛМӨР ХАМГААЛАЛТЫН ИЖ БҮРЭН ХУВЦАС хүлээлгэн өглөө. Уг дэмжлэгийг багийн дарга нар малчид болон мал бүхий иргэдэд хуваарилна.
Улсын болон аймгийн Онцгой комиссоос тус суманд өнгөрсөн хугацаанд дараах тусламж, дэмжлэгийг үзүүлсэн байна.
Үүнд,
-Засгийн газрын 449, 479 дүгээр тогтоолоор Улсын нөөцөөс 3000 боодол өвс хөнгөлөлттэй үнээр
-Дорнод аймгийн Матад сумаас татан авсан 25000 боодол өвснөөс нийт 3000 боодлыг 50 хувийн хөнгөлөлттэй үнээр
-УОК-оос 22.1 тонн тэжээл
-Улаан загалмайн хорооноос нийт 50 өрхөд 30.3 сая төгрөгийн дэмжлэг
-105 тонн улаан буудай
-“Багануур” ХХК-иас 20 тонн нүүрс, 2.5 тонн тэжээл
-Гамшгийн эрсдэлийн сангаас 23.0 сая төгрөг
-Аймгийн Засаг даргаас дэмжлэг болох 3.3 сая төгрөг тус тус олгосон байна.
