Хэнтий аймгийн Боловсролын газар, Хүртээмжтэй боловсрол ТББ хамтран ЕБС-ийн төгсөгчдийн Элсэлтийн шалгалтын чанарыг сайжруулах хөтөлбөрийн хүрээнд танхимын сургалтыг эхлүүлж, нээлтийн үйл ажиллагааг зохион байгууллаа. Нээлтэд аймгийн Засаг дарга Д.Аюурбунь, АЗДТГ-ын НБХ-ийн дарга Б.Түмэнжаргал болон ЕБС-ийн захирлууд оролцлоо.
Сургалтад аймгийн ЕБС-ийн Математик, Хими, Физик, Англи хэл, Нийгмийн хичээлийн мэргэжлийн 203 багш хамрагджээ. Уг сургалтыг " Хүртээмжтэй боловсрол" ТББ -ын улсын олимпиадын аварга багш нар удирдан явуулах юм.
Сургалт багш, сурагчид гэсэн хоёр хэсэгт явагдах бөгөөд багш нарын сургалт танхимаар, сурагчдынх онлайнаар явагдах аж. Сурагчдын онлайн сургалт нь элсэлтийн шалгалтын өдөр хүртэл явагдах учраас онлайн сургалтын чанарыг сайжруулах үүднээс эхлээд багш нарын ур чадварыг сайжруулж байгаа нь энэ юм.
Энэ жил Хэнтий аймагт 12 дугаар анги төгсөж буй 928 хүүхэд бий. Математик, физик, хими, англи хэл, нийгэм гэсэн 5 хичээлээр тусгайлсан групп нээгээд таван бүлэгт хуваагдан онлайнаар сургалтад хамрагдаж элсэлтийн шалгалтын чанарт ахиц гаргах юм байна.
