Өвөлжилт хүндэрч, төмөр зудын хэмжээнд хүрсэн сумдын нэг бол Баянмөнх сум юм. Тэгвэл улсын болон аймгийн онцгой комисс өнөөдөр Баянмөнх суманд ажиллаж, тус сумын өвөлжилтийн нөхцөл байдалтай танилцахаар өргөтгөсөн хуралдааныг зохион байгууллаа. Хуралдааны эхэнд сумын Засаг дарга Б.Золжаргал өвөлжилтийн мэдээллийг танилцуулахад:
- 2024 оны 2 дугаар сарын 19-ний байдлаар Баянмөнх сум нийт нутаг дэвсгэр бүхэлдээ цасан бүрхүүлтэй цасны зузаан хамгийн нимгэн 8см, хамгийн зузаан нь 23 см дундаж 16-18 см нягт 0.32-35 хунгарын зузаан 38-65 см зарим гуу жалганд 120-150 см байна. Хөрийн зузаан 10-18 см байгаа бөгөөд Дулаан, Баянбулаг багууд төмөр зудтай, Хэрлэн баг цагаан зудтай байгаа юм.
- Тус сум жилийн эцсээр 203.527 толгой мал тоолуулсан. 2024 оны 2 дугаар сарын 19-ний байдлаар нийт 30.519 толгой мал хоргоджээ.
- 2 дугаар сарын 17-оос хойш цасанд боогдсон шуурхай тусламж шаардлагатай 110 өрх байна гэдгийг онцоллоо.
Харин сумын хэмжээнд туулах чадвар машин техник байхгүй 30 ковшоор зам гаргах ажлыг хийж байна. Сумын хэмжээнд ганц байсан эмнэлгийн түргэн тусламжийн машинаараа дуудлагад явах, хүн эрэн хайх аврах ажилд дайчлан явсаар өнөөдөр диск нь эвдэрсэн, зогссон байдалтай байна гэлээ.
Ихэнх сумдын хувьд туулах чадвар сайтай машин байхгүй, эмнэлгийн түргэн тусламжийн машинууд эвдэрсэн гэх асуудлууд ихээр тавигдаж байгаа тул аймаг орон нутгийн зүгээс нөөц боломждоо тулгуурлан эхний ээлжид төрийн байгууллагуудын туулах чадвар сайтай машинуудын судалгааг гаргаж цас ханзартал нэн шаардлагатай сумуудад түр хугацаагаар хэрэглүүлэхээр судалж байгаа юм. Мөн энэ оны төсөвт 5 суманд PROBOX маркын автомашин авч өгөхөөр тусгажээ.
Улсын болон аймгийн онцгой комисс хамтран эхний ээлжид өвөлжилт хүндэрсэн Дархан, Баянхутаг, Баянмөнх, Галшар, Өмнөдэлгэр, Баянхутаг, Баян-Адарга, Батноров гэх найман суманд өвс тэжээл, хивэг, будаа, хүнс болон эрүүл мэндийн багц өгөх бөгөөд аль суманд, хэрхэн олгогдохыг орон нутаг хуваарилах юм. Мөн эдгээр найман сумдад зам гаргах машинууд ажиллана.
