УОК болон аймгийн онцгой комиссын хамтарсан баг Дархан суманд ажиллаж байна. Дархан сумын тухайд өвөлжилт хүндэрч, энэ сарын 15-наас эхлэн төмөр зудын хэмжээнд хүрсэн. Цаг агаарын байгалийн давагдашгүй хүчин зүйл байгалийн гамшгийг хохирол багатай туулах үүднээс малчдадаа 3900 боодол өвс 19тн хивэг тэжээлийг хөнгөлөлттэй үнээр, 10 тн хорголжин тэжээлийг үнэ төлбөргүй олгожээ. Мөн Дорнод аймгаас 16000 боодол өвсийг авчирч нийлүүлсэн ч хаанаа ч хүрэлцэхгүй байна гэдгийг сумын Засаг дарга Ж.Энхтөр мэдээллийн эхэнд онцоллоо.
Тус сум 618 малчин өрх, 270.476 толгой малтай. Гэвч энэ жил өвөлжилт хүндэрснээс болж 25 өрх огт малгүй болжээ. Үүгээр ч зогсохгүй зам харгуй боогдож, мал бэлчээрлэх талбайгүй болох, зарим айл өрхүүд цасанд дарагдсан байдалтай хүнд өвлийг давж, хавартай золгож байна.
Тиймээс малчдад өвс тэжээлийн тусламж хүргэх, малын индексжүүлсэн даатгалын болон хорогдсон малд улсаас тодорхой хэмжээний нөхөн олговор олгох, банкны зээлийн төлөлт дээр анхаарах, зам харгуй гарах, эрүүл мэндийн төвд туулах чадвар сайтай автомашинтай болгох, малын гаралтай өвчнөөс урьдчилан сэргийлэх вакцины нөөц бүрдүүлэх, Малахын талын отрын бүс нутгийг чөлөөлүүлэх, зүй бусаар хоргодсон малын сэг зэм цэвэрлэх санхүүжилт зэргийг тус тус шийдвэрлэж өгөхийг улсын болон аймгийн онцгой комиссын ажлын хэсэгт уламжиллаа.
Тэгвэл Дархан суманд эхний удаад улсын онцгой комиссоос олгож буй тэжээл, хүнсний багцаас тодорхой хувийг олгож, 7-14 хоногийн хугацаатай зам гаргах туулах чадвар сайтай машиныг ажиллуулахаар боллоо.
