ММСУХ нь өнгөрөгч арваннэгдүгээр сард гучин жилийнхээ ойн хүрээнд спортын тэмцээнийг зохион байгуулсан бөгөөд энэ үеэр тод манлай, манлай, алдарт уяачдын дунд сагсан бөмбөгийн нөхөрсөг тэмцээнийг явуулсан. Тэгвэл тус тэмцээнд оролцсон уяачид тэмцээний үеэр босгосон хандивын мөнгөө сайн үйлд зориулж ЭХЭМҮТ-ийн хүүхдийн эрчимт эмчилгээ, мэдээгүйжүүлэх хагалгааны тасгуудыг шаардлагатай тоног төхөөрөмжөөр нь хангалаа.
Тодруулбал дуслын шахуурга, отсос, утлагын аппарат, сувилагчийн тэргэнцэр, яаралтай тусламжийн цүнх, хүүхдийн хяналтын монитор, pulse oximeter rad-G гэх мэт нэн яаралтай тусламжийн 20 орчим сая төгрөгийн тоног төхөөрөмжийг ММСУХ-ны ерөнхийлөгч тод манлай уяач Д.Дагвадорж, ерөнхий нарийн бичгийн дарга Ц.Ганбаяр, Сэлэнгэ аймгийн харьяат Монгол улсын манлай уяач Б.Эрдэнэгэрэл нар тус эмнэлгийн удирдлагуудад өнөөдөр гардуулан өглөө.
ММСУХ нь томоохон уралдаан, арга хэмжээнүүдийнхээ дараа хүүхэд болон хүүхдийн байгууллагад чиглэсэн хандивын ажлыг шат дараатай зохион байгуулдаг бөгөөд ЭХЭМҮТ-д энэ удаа хүлээлгэн өгсөн тоног төхөөрөмж нь тус холбооны анхных бус дахин хандивлаж байгаа явдал аж.
