Жил бүрийн 12 дугаар сарын 1-ний өдрийг ДОХ-тэй тэмцэх өдөр болгон олон улсад тэмдэглэдэг билээ. Тус өдрөөр дэлхий нийтээр ХДХВ/ДОХ-той тэмцэх үйл ажиллагааг эрчимжүүлж, халдвараас урьдчилан сэргийлэх, хүн бүрийн оролцоог нэмэгдүүлэх зорилгоор нөлөөллийн ажлуудыг зохион байгуулдаг уламжлалтай.
Манай улсын хувьд ч жил бүр ХДХВ/ДОХ-ын асуудалд анхаарал хандуулж уг өдрийг төр, төрийн бус, иргэний нийгмийн байгууллагуудтай хамтран тэмдэглэн өнгөрүүлдэг. Энэ онд тус өдрийг “Олон нийтийн манлайллыг дэмжье” уриан дор зохион байгуулж байна.
Хэнтий аймгийн Нэгдсэн Эмнэлгийн хувьд ч энэхүү өдрийг угтаж жил бүр зорилтот ажлуудыг зохион байгуулдаг бөгөөд энэ жил Азифарм эмийн сан, аймгийн Политехникийн Коллежийн оюутнуудтай хамтран "Нээлттэй хаалганы өдөрлөг"-ийг зохион байгууллаа.
Тус өдөрлөгөөр иргэдэд бэлгийн замаар дамжих халдварт өвчний талаар болон БЗДХ-ийн халдвараас хэрхэн урьдчилан сэргийлэх талаар зөвлөгөө өгөх, иргэдийг сайн дурын ДОХ, Тэмбүү зэрэг БЗДХ-ийн халдварыг илрүүлэх шинжилгээнд хамруулахаас гадна дархлаа дэмжих халуун аньс, чацаргана, витамин тараасан юм.
