Өнгөрөгч долоо хоногт П.Сайнзориг гишүүн Засгийн газарт “асуулгын бороо” оруулж, наймдугаар сард батлагдсан АМНАТ-ын (ашигт малтмалын нөөц ашигласны төлбөр) асуудлыг сөхжээ. Ингэхдээ улсын төсөвт орж ирэх байсан 200 тэрбум төгрөгийн “мөнгөний үүдийг” хаасан шийдвэрийг Засгийн газар баталсан талаар дэлгэж, энэ талаар ҮХЦ-д хүртэл хандахаа мэдэгдсэн байна.
Үүнтэй холбоотойгоор тэрбээр Ерөнхий сайдад огцруулах санал хүргүүлэх бичиг гаргаж, УИХ-ын гишүүдээс гарын үсэг цуглуулж эхэлжээ. Хамгийн сонирхолтой нь, одоо 40 гаруй гишүүн аль хэдийнэ гарын үсгээ зурчихсан гэнэ шүү. Энэхүү “тэсрэлттэй” бичгийг өнөөдөр буюу Даваа гарагт өргөн барихаар төлөвлөсөн аж. Улс төрийн ордон дотор тун удахгүй халуун тогоо буцлах нь дээ.
