Зүүн бүсээс сонгогдсон УИХ-ын гишүүд Сүхбаатар аймгийн Онгон сумын иргэд, малчид, бизнес эрхлэгчдийн төлөөллүүдтэй уулзалт хийв. Мөн хөрш зэргэлдээ Дарьганга, Наран, Баяндэлгэр сумын удирдлагууд уулзалтад ирж оролцлоо. Хүнс, хөдөө аж ахуй, хөнгөн үйлдвэрийн яамнаас бүсчилсэн хөгжлийн үзэл баримтлалын дагуу “Орон нутгийн хөгжлийн төв” төслийг төр, хувийн хэвшлийн түншлэлээр хэрэгжүүлэхээр зорин ажиллаж байна. Монгол Улсын Бүсчилсэн хөгжлийн бодлогод 21 аймгийн төв, 70 суманд Сум дундын хөгжлийн төв буюу “Орон нутгийн хөгжлийн төв” байгуулахаар тусгасан. Сүхбаатар аймгийн хувьд Баруун-Урт, Онгон, Эрдэнэцагаан, Мөнххаан сумд юм.
Онгон сумын хүн ам, газар нутгийн онцлог зэргийг харгалзан Дарьганга, Наран, Баяндэлгэр сумдын таталцлын төв байхаар тодорхойлсон. Орон нутгийн хөгжлийн төв байгуулна гэдэг нь байшин барилга барих тухай биш иргэд, малчдад бизнесийн зөвлөх үйлчилгээ үзүүлэх, малынгаралтай түүхий эдийн ангилан ялгалт, анхан шатны боловсруулалт хийх бага оврын үйлдвэр, малын тэжээлийн үйлдвэр байгуулах, хөдөө аж ахуйн тоног төхөөрөмжийн түрээсийн үйлчилгээ үзүүлэх юм.
