Өмнөдэлгэр сумын онцгой комиссын өргөтгөсөн хуралдаан болж, аймгийн Засаг дарга Ц.Чогсомжав, ХХААГ-ын дарга Ж.Энх-Амгалан, ДЗОУБ-ын Бор-Өндөр II хөтөлбөрийн менежер Г.Жаргалбат болон сумын малчид, иргэд оролцлоо. Хуралдаанаар сумын өвөлжилтийн нөхцөл байдал, тулгамдаж буй асуудал, аймаг орон нутгаас авч хэрэгжүүлж буй арга хэмжээний талаар танилцуулсан юм.
Өмнөдэлгэр сумын тухайд Баянзүрх, Хэнтий багууд цагаанаар Наран, Талынбулаг, Чандган, Төвийн, Гурванбаян багууд цагаан зудтай байна. Энэ онд 1548 өрхөд 546 мянган толгой мал тоолуулснаас өвөлжилт хүндэрч долоон багийн 7202 толгой мал буюу нийт малын 1.3 хувь нь \2024.02.21-ний өдрийн байдлаар \зүй бусаар хорогдоод байгаа юм.
Мөн өвөлжилт, хаваржилт хүндэрснээс шалтгаалан 393 өрх цасанд боогдсон бол 646 өрхөд өвс тэжээл, 38 өрхөд хүнсний тусламж нэн шаардлагатай байна.
Үүнтэй холбоотойгоор сумын аюулгүйн нөөцөд 61 тн өвс, 40 тн тэжээлийг 160 өрхөд олгосон. Засгийн газраас 50 хувийн хөнгөлөлттэй үнээр олгосон 240 шуудай тэжээлийг зургаан багийн 160 малчинд өгсөн байна. Мөн улаан загалмайн хорооноос 2.2 тн хорголжин, Стрийм төслийн хүрээнд 48 өрхөд арван тэжээл, 1.7 тн ашигт долооцыг тус тус олгожээ. Түүнээс гадна Дэлхийн банкны хөрөнгө оруулалттай хэрэгжүүлж байгаа МАА-н ЭЗЭН төслөөс Баянзүрх багийн 50 өрхөд 4 тн хорголжин тэжээлийг олгосон байна.
Харин одоогоор Багануур ХХК-аас 500 шуудай нүүрс, 100 шуудай хивэг тараах ажил хийгдэж байгаа бол ДЗОУБ-ын Бор-Өндөр II хөтөлбөр, аймгийн онцгой комисстой хамтран тус сумын 40 өрхөд 8 тн тэжээлийн хивгийн буцалтгүй тусламж үзүүлж, өнөөдөр хүлээлгэн өглөө. Мөн аймгийн онцгой комиссын зүгээс 5 сая төгрөгийн хүнсний багц олгох юм.
Сумын зүгээс даваа нээх, зам гаргах 960 км замын шатахууны зардал, шаардлагатай байгаа 152.5 тн өвс, 37.5 тн тэжээл болон туулах чадвартай автомашиныг шийдвэрлэж өгөхийг хүслээ.
