Хэдхэн хоногийн өмнө Монгол улсын 2024 оны улсын нэгдсэн төсөв УИХ-аар батлагдсан. Тэгвэл Хэнтий аймагт хуваарилагдсан хөрөнгө оруулалтын дүн дунджаас гурав дахин их буюу бусад аймгийн төсөвтэй харьцуулахад өндөр байна хэмээн олон нийт шүүмжилсээр байгаа юм.
Тухайлбал өнгөрсөн онд 271 тэрбум төгрөгийг төсөвлөсөн байдаг. Харин 2024 оны УТХО-аар шинээр 24, шилжих 18 ажил хэрэгжихээр болжээ. Тэгвэл Хэнтий аймгийн төсөв яагаад өндөр тавигдсан, энэ их төсвийн мөнгө юунд зарцуулагдах вэ?
Хэнтий аймагт төсөв их тавигдаад байгаа гол шалтгаан түүхэн аялал жуулчлалын бүс нутгуудыг хөгжүүлж, жуулчдыг татах хөрөнгө нь аймагт тавигдсан төсвийн 70-аад хувь нь.
МУ-ын засгийн газраас Их Эзэн Чингис хааны өлгий нутгийг түшиглэж аялал жуулчлалыг хөгжүүлэх хэрэгтэй гэж үзэн Хэнтий аймгийг түүхэн аялал жуулчлалын бүс болгон зарласан. Үүнтэй холбоотойгоор авто замын ажлууд 2024 оны төсөвт түлхүү тусгагджээ. Тодруулбал Улаанбаатар-Чингис хот чиглэлийн авто замаас Өмнөдэлгэр сум хүртэлх хатуу хучилттай авто зам, Өндөрхаан-Норовлин чиглэлийн хатуу хучилттай авто замын үргэлжлэл мөн боомтын сэргэлтийн хүрээнд Хэнтий аймгийг БНХАУ-тай холбох зорилгоор Өндөрхаан-Бор-Өндөр сум хүртэл авто зам тавих гэх мэт ажлууд хэрэгжих юм. Тиймээс Хэнтий аймагт төсөв их тавигдаад байгаа гол шалтгаан түүхэн аялал жуулчлалын бүс нутгуудыг хөгжүүлж, жуулчдыг татах хөрөнгө нь аймагт тавигдсан төсвийн 70-аад хувийг эзэлж байгаатай холбоотой хэмээн төсөв хуваарилагчид үзэж байна.
Мөн "Шинэ хөдөө” төслийг эхлүүлж, алслагдсан багуудад үүрэн холбооны сүлжээ тавигдахаас гадна сумдад спорт заал, цэцэрлэг, ясли, өрхийн эмнэлэг зэрэг нийгэм, соёлын байгууламжууд болон Чингис хотын инженерийн шугам сүлжээ 3,4,5 дугаар багуудад хэрэгжихээр болжээ.
