Талын нүүдэлчин, малчдын мал маллах арга ухаан, ялангуяа адуу маллах арга ухаан, түүнийг дагасан соёлын биет болон биет бус өвийг сурталчлан таниулах, түгээн дэлгэрүүлэх зорилготой “Талын түмэн адуу” эвэнт арга хэмжээ Хэнтий аймгийн Батноров суманд зохион байгуулагдлаа.
Тус арга хэмжээний үеэр “Эмнэг булгиулах тэмцээн”, “Богино зайн морины уралдаан”, “Сээр цохих тэмцээн”, “Сүлдэнд мөнхөрсөн хүлэг морины дууны тэмцээн”, “Хийморь” гэрэл зургийн үзэсгэлэн, “Сайхан морьтон хос” “Удамт монгол морьтон хүүхдийн жагсаал”, “Адууны зүс зүсэлгээний тэмцээн”, “Шургуу-2023”, “Тайга нохойн богино зайн уралдаан” зэрэг тэмцээн, уралдаан зохион байгуулагдсан юм.
“Талын түмэн адуу-2023” арга хэмжээг гадаад, дотоодын 3000 орчим үзэгч, аялагчид үзэж сонирхлоо. Наадмыг Монгол Улсын Соёлын яам, Байгаль орчин, аялал жуулчлалын яам дэмжин ажиллаж, ерөнхий зохион байгуулалтыг Хэнтий аймгийн ЗДТГ, аймгийн Соёл урлагийн газар, аймгийн Байгаль орчин аялал жуулчлалын газар, Батноров сумын ЗДТГ, “Мөнх Харилцаа” ТББ хийж гүйцэтгэжээ.
Photo by:Монголын гэрэл зурагчдын нэгдсэн холбоо, Орон нутгийн гэрэл зурагчдын нийгэмлэг
