УИХ-ын гишүүн У.Отгонбаяр УИХ-ын даргын захирамжаар байгуулагдсан “Боомтыг олон улсын жишигт нийцүүлэн төрөлжүүлэн хөгжүүлэх, боомтын хяналт, аюулгүй байдлыг хангах, байгууллагуудын ажлын уялдаа, татварын зохицуулалт, дэд бүтэц, логистикийн үйлчилгээ, боомтын захиргаанаас орон нутгийн хөгжилд үзүүлэх дэмжлэгтэй холбоотой үйл ажиллагаанд дагаж мөрдөж байгаа дүрэм, журам, хууль эрх зүйн зохицуулалтуудыг судлан, санал, дүгнэлт гаргах, холбогдох шийдвэрийн төсөл боловсруулах үүрэг бүхий ажлын хэсэг”-ийг ахлан ажиллаж байна.
Төрийн болон хувийн хэвшлийн байгууллагын танилцуулгыг сонсож, хийсэн ажлуудын туршлагыг бусад боомттой аймгуудад, ялангуяа Бичигтийн боомтод нэвтрүүлэх зорилгоор Шивээхүрэн боомтыг сонгож ажлын хэсгийг хуралдуулж байна. Иймд Сүхбаатар аймгийн удирдлагууд, Эрдэнэцагаан сумын удирдлагуудыг мөн энэхүү ажлын хэсгийн хуралд оролцуулан туршлага судалж байна.
Шивээхүрэн боомтод “Боомтын сэргэлт”-ийн хүрээнд хийгдсэн шинэчлэл, бүтээн байгуулалтын ажлыг төр, хувийн хэвшлийн хамтын ажиллагааны хүрээнд богино хугацаанд амжилттай гүйцэтгэж чадсан. Энэ нь боомттой бүс нутгуудад сайн жишиг, шилдэг туршлага болж байгаа юм.
Ажлын хэсгийн хуралдаанд :
УИХ-ын дэд дарга Б.Пүрэвдорж, УИХ-ын гишүүн, Боомтын сэргэлтийн үндэсний хорооны дарга Б.Тулга, УИХ-ын гишүүн, ХББОС-ын сайд Ж.Батсуурь, УИХ-ын гишүүн Э.Болормаа, Б.Уянга, Г.Хосбаяр, Л.Соронзонболд нарын гишүүд оролцож байна. Мөн Монгол Улсын Ерөнхий сайд асан, Засгийн газрын Тусгай үүрэгт элчин сайд С.Баяр, Монгол Улсын Ерөнхий сайдын ахлах зөвлөх Д.Амгаланбаатар, ЗТХЯ-ны Төрийн нарийн бичгийн дарга С.Батболд, Хилийн боомтын захиргааны дарга Б.Батхишиг, Монгол Улсаас БНХАУ-ын ӨМӨЗО-ны Хөх хотод суух Ерөнхий консул Ш.Оргил, Өмнөговь, Сүхбаатар аймгийн удирдлагууд болон гааль, хилийн цэргийн төлөөллүүд томилолтоор ажиллаж байна.
