Өнгөрсөн амралтын өдрүүдээр Хэнтий аймгийн Засаг дарга Д.Аюурбунь, АЗДТГ-ын ТЗУХ-ийн дарга Б.Золбоо нар Цэргийн штабын бие бүрэлдэхүүний хамтаар Зэвсэгт хүчний 327, Хилийн цэргийн 0306, 0198 дугаар ангиудад хугацаат цэргийн алба хааж буй дайчдаа эргэж, тэдний алба хааж буй орчин нөхцөлтэй танилцлаа.
Уулзалтын эхэнд аймгийн Засаг дарга аймаг орон нутгийн ажил, залуучуудруу чиглэсэн бодлого шийдвэрийг танилцуулж, Цэргийн штабын дарга, дэд хурандаа Л.Цэнддорж Эх оронч Монгол- Их сэргэлтийн жилийн хүрээнд Батлан хамгаалах салбарт хийгдэж буй ажлын талаар танилцууллаа.
Хилчин дайчидтай хийсэн уулзалтын үеэр цэргүүд: Цэргийн эрдэмд шамдан, эр зориг тэсвэр тэвчээрт суралцаж, эх орныхоо торгон хил дээр олон аавын хөвгүүдтэй мөр зэрэгцэн алба хааж буйгаараа ихэд бахархан, эх орныхоо үнэ цэн, тусгаар тогтнолыг улам илүү ихээр хайрлаж хамгаалж явах нь эр хүн бүрийн үүрэг юм гэдгийг бахархалтайгаар ярьцгааж байв. Мөн тэд бие бялдарын болоод сэтгэлзүйн хувьд урьд өмнөхөөсөө илүү хүчирхэг болж олон талт өөрчлөлт гарсан төдийгүй жинхэнэ эрчүүдийн нөхөрлөл цэргийн албанд эхэлдэг юм байна гэдгийг ойлгож, хугацаат цэргийн албанд татагдан ирсэндээ туйлын их баяртай байгаагаа илэрхийллээ. Мөн аав ээж ахан дүүсдээ “Хүү нь сайн байгаа, хугацаат цэргийн албаа нэр төртэй хаагаад удахгүй очно оо” гэдэг мэндийн үгийг ч биднээр дайж байв.
Аймгийн Засаг дарга Д.Аюурбунь “Эрэлхэг зоригт хөвгүүд та нар минь төрөлх нутгийнхаа хөгжил дэвшлийн төлөө өөрийн мэдлэг чадвар, ур ухаанаа дайчлан, чин сэтгэлээ зориулан ажиллах Хан Хэнтийн ирээдүйн лидерүүд юм шүү гэдгийг онцлон хэлж, Эр цэрэг, эр хүн гэдэг шаардлага гарвал эх орныхоо төлөө амиа ч үл хайрлан зүтгэх зүрх зоригтой байдаг юм шүү. Тэсвэр хатуужил, зориг тэнхээ, дэг журам, сахилга хариуцлагаа улам чамбайруулж цэргийн эрдэмдээ сайн суралцана гэдэгт эргэлзэхгүй байна. Хан Хэнтий нутгийнхаа төдийгүй Монгол Улсынхаа ирээдүй болсон эрэлхэг хөвгүүддээ бид итгэж байна” гэв.
