УИХ-ын гишүүн Ц.Идэрбат, У.Отгонбаяр нар Биндэр сумын Дэлгэрхаан, Онон багийн малчид, иргэд, төрийн албан хаагчидтай уулзалт хийж, УИХ-ын хууль тогтоол, Засгийн газрын онцлог шийдвэрийн талаар мэдээлж, иргэдийн сонирхсон асуултанд хариулж санал солилцлоо.
Биндэр сумын хувьд 536,6 мянган га газар нутагтай, 1404 өрх 4300 хүн амтай, 265 мянган малтай, 400 шахам ААН үйлчилгээ эрхэлдэг – хөдөлмөрч зон олонтой Хэнтий аймгийн томоохон сум юм. Онон Хурхын бэлчир, Хурх голын хойд хөвөөнөө төвлөрсөн сум юм.
Сүүлийн жилүүдэд Их хуралдай түүхэн аялал жуулчлалын цогцолбор, 20 ортой Сум дундын эмнэлэг, Цэцэрлэг, Онон голын төмөр бетон гүүр, сургуулийн спорт заал баригдсан. Дотоодын аялал жуулчлал сайн хөгжиж байгаа сум юм.
Үүнчлэн Биндэр сум нь Номхон далайн усны савд багтах уулын түргэн урсгалт Онон, Хурх, Балж, Хөмөл, Хүйтэн, Шуус зэрэг том жижиг 30 гаруй гол горхи, Цэгээн, Булан, Холбоо, Цэмбэл, Цагаан нуур зэрэг 20 шахам нуур цөөрөм, Далайн булаг, Талын булаг, Зүүн баяны булаг шандтай, олон гол мөрний хүйс болсон нутаг. Тиймээс 2020 онд Гутайн даваанд үйл ажиллагаа явуулж байсан ААН-үүдийн эрхийг цуцалж Гутайн даваа-Хөмүүл голын эхийн байгалийн цогцолборт газрыг Монгол Улсын Их Хурлын 2020 оны 46 дугаар тогтоолоор улсын тусгай хамгаалалтад авсан байдаг. Улмаар 2022 онд Хэнтий аймгийн Батширээт, Биндэр сумын нутгийг дамнан орших Гутайн даваа-Хөмүүл голын эхийн байгалийн цогцолборт газрын хамгаалалтын захиргааг Биндэр сумын төвд байгуулсан юм.
