Улсын төсвийн хөрөнгө оруулалтаар Бор-Өндөр суманд баригдаж буй “Залуучуудын сургалт спорт хөгжлийн төв”–ийн барилга угсралтын ажил эхлээд ГХБХБГ-аас захиалагчийн техникийн хяналт гүйцэтгэлээ.
Тодруулбал барилгын ажлын явц 12 хувьтай үргэлжилж байгаа бөгөөд А, С, D, F болон 2, 3, 4-4, 9, 11, 12, 13, 14-р тэнхлэг дагуух цутгамал хана, баганын арматурчлал, хэвний угсралтын ажлууд хийгдэж байна.
Барилгын зураг төсөл зохиогчоор “Зэтпрожект” ХХК, барилгын ажлын гүйцэтгэгчээр “Си Эйч Би Жи Констракшн” ХХК ажиллаж байгаа юм.
Хяналтаар дараах зөвлөмж үүрэг даалгавруудыг гүйцэтгэгч компанид өглөө. Тухайлбал:
– Угсралтын ажлын талбайд хөглөрсөн материалын үлдэгдэл, хадаас, прүүс гэх мэтийг нэн даруй цэвэрлэж ИТА-н аюулгүй байдлыг хангах,
– F8-р баганын ёроолд цутгалтын үеийн технологийн алдаанаас үүсэж арматур бага зэрэг ил гарсан хэсэгт тоос шороог сайтар цэвэрлэж хүчитгэн цутгаж бат бэхийг хангах,
– Бетон цутгалтыг гадна агаарын температур хамгийн багадаа дараалсан 3 хоног 0 хэмээс доош ороогүй нөхцөлд цутгах,
– Хүйтний улиралд бетон зуурмаг бэхжиж амжилгүй хөлдөж, барилгын бат бэх байдалд сөргөөр нөлөөлдөг учир гаднах агаарын температур 0 хэмээс доош үед бетон цутгалтын ажил хийхээр бол зохиогч, захиалагч талтай зөвшилцсөний үндсэн дээр Хүйтний улиралд бетон цутгах технологиос аль тохиромжтой аргыг сонгож технологийн шаардлагын дагуу цутгалтын ажлыг хийх,
– Арматурчлал, хэвний ажил дуусаж цутгах авахаас өмнө зохиогчийн хяналтыг газар дээр нь хийлгэх,
– Суурийн угсралтаас гарсан арматурт наалдсан бетоны үлдэгдлийг нэг бүрчлэн хусаж цэвэрлэх,
– Хэв хашмалын ёроолд байгаа хог, тоос шороо, бетоны үлдэгдлийг сайтар цэвэрлэж дараагийн үе шатны бетон цутгалтад бэлдэх, фото зургаар баталгаажуулах,
– Угсралтад орж буй арматур, катангийн зэвийг арилгах зэрэг үүрэг даалгавар өглөө.
