Аймгийн Засаг даргын ивээл дор анх удаа зохион байгуулагдаж буй “Шилдэг залуу офицер, ахлагч шалгаруулах тэмцээн”-ий I шат амжилттай зохион байгуулагдаж, өнөөдөр нээлтийн үйл ажиллагааг зохион байгууллаа. Энэ үеэр I дүгээр шатанд шалгарсан шилдэг 40 албан хаагчийг тодруулж, 500 мянган төгрөгийн батламж гардуулан өглөө.
Эдгээр албан хаагчид цаашид 7 багт хуваагдаж II шатанд өрсөлдөх бөгөөд 2024.03.15-ны өдрөөс 2024.08.01-ний өдрийг хүртэлх хугацаанд хоёр гэрийн даалгавар гүйцэтгэнэ.
Тодруулбал баг бүр байгууллагынхаа 1 албан хаагчийг сонгож амьдрах орчныг сайжруулах сайн үйлсийн ажлыг байгууллагынхаа хамт олныг хамруулан зохион байгуулна. Мөн 1-р шатанд хэлэлцүүлсэн нийт илтгэлүүдээс практикт шийдэх боломжтой нэг асуудлыг багаараа сонгож тухайн асуудлыг байгууллага дээрээ хэрэгжүүлж, үр дүн гаргасан байна.
Үргэлжлүүлээд Цэргийн дүрмийн мэдлэг, бие бялдрын бэлтгэлжилт, асуудал шийдвэрлэх чадварын болон сэтгэл зүйн тест, галт зэвсэг ашиглах, хэрэглээний программын мэдлэг, хууль, эрх зүйн мэдлэгийг тестээр шалгаж, тэмцээн, шалгалт бүрийн дүнг их онооны системээр дүгнэх бөгөөд 1-100 оноогоор жагсааж, нийлбэр дүнгээр байр эзлүүлнэ.
Сүүлийн шат нь Дадал суманд зохион байгуулагдах бөгөөд эрэгтэй, эмэгтэй офицерын тэргүүн байр тус бүрт өргөмжлөл, 5,000,000 төгрөг, эрэгтэй, эмэгтэй ахлагч тэргүүн байр тус бүр өргөмжлөл, 5,000,000 төгрөг, хоёр гэрийн даалгаврын нийлбэр оноогоор хамгийн өндөр дүгнэгдсэн багт 3,000,000 төгрөгийн мөнгөн урамшуулал, талархал олгоно.
