Дэ Нэйчэ Консерванси байгууллагын Монгол дахь төлөөлөгчийн газар нь 2017 оноос “Нутгийн иргэдийн манлайлсан байгаль хамгаалал” төслийг хэрэгжүүлж байгаа бөгөөд одоогоор нийт 5 аймгийн 28 сум үүний дотор Хэнтий аймгийн 9 сумын байгалийн нөөцийн хамтын менежментийн нийт 103 нөхөрлөлтэй хамтран ажилладаг.
Энэхүү төсөл нь Байгаль орчныг хамгаалах тухай хуулийн дагуу нутгийн иргэд байгалийн нөөцийг хамтарч хамгаалах, зохистой ашиглах, нөхөн сэргээх эрхээ баталгаажуулах, байгалийн нөөцийн хамтын менежментийн харилцаанд оролцогч талуудыг чадваржуулах, БНХМ-ийн нөхөрлөлийн хариуцан хамгаалж буй газар нутагтай давхцаж байгаа тусгай хамгаалалттай газрын менежментийг сайжруулахад нутгийн иргэдийн оролцоог нэмэгдүүлэх үндсэн зорилготой үйл ажиллагаагаа явуулдаг.
Тус байгууллагын зүгээс өвөлжилт, хаваржилт хүндэрч байгаа энэ цаг үед хамтран ажилладаг Батноров, Баян-Овоо, Өмнөдэлгэр, Батширээт, Баян-Адарга, Биндэр, дадал, Норовлин, Дэлгэрхаан сумын Онцгой комисст нийт 34,0 сая төгрөгийн шатахууны дэмжлэг үзүүллээ. Энэхүү шатахууныг цасанд боогдсон зам давааг чөлөөлөх, малчин өрхүүдрүү зам гаргах гэх мэт шаардлагатай зүйлүүддээ зарцуулахыг хүссэн бөгөөд мөнгөн дүнг тухайн сумдын ШТС-уудруу шилжүүлж, зарцуулалтад нь тус суманд ажиллаж буй орон нутгийн зохицуулагчид хяналт тавихаар болсон байна.
