Дорнод аймгийн Засаг дарга Б.Бат-Эрдэнэ Байгаль орчны газрын үйл ажиллагаатай танилцаж, хэрэгжүүлж буй ажил, арга хэмжээний мэдээллийг сонслоо.Тус газар нь Байгаль орчин, аялал жуулчлалын газар нэртэйгээр үйл ажиллагаа явуулж байсан бол Засгийн газрын 2024 оны 06 дугаар тогтоолоор Байгаль орчны газар болон өөрчилсөн. Байгаль орчны газар нь байгаль орчныг хамгаалах, нөхөн сэргээх, зохистой ашиглах, хяналт тавих, үйл ажиллагааг хэрэгжүүлэх үндсэн чиг үүргээ хэрэгжүүлэн ажиллаж байгаа бөгөөд одоогийн байдлаар 4 суманд байгаль орчны байцаагчийн сул орон тоог нөхөх шаардлагатай байна гэдгийг газрын дарга А.Гантулга хэлж байна.
Харин аймгийн Засаг даргын зүгээс сул орон тоог яаралтай нөхөх чиглэлээр дэмжиж ажиллах, мөн байгаль орчинд сөрөг нөлөөлөл үзүүлж буй хариуцлагагүй уул уурхайн үйл ажиллагаа эрхэлж буй аж ахуйн нэгжүүдтэй хуулийн хүрээнд хариуцлагыг мөрдүүлж ажиллахаа илэрхийлж, хавар намрын улиралд хар ялаа, хортон шавжийг устгах ажлыг үе шаттайгаар үр дүнтэйгээр хэрэгжүүлэх зэргээр санал солилцлоо.
