Төрийн албаны тасралтгүй хэвийн үйл ажиллагаа, хүний нөөцийн бүрдлийг хангахад чиглэсэн төрийн албаны ерөнхий шалгалт өнөөдөр (2024.03.13) орон даяар нэгэн зэрэг эхэллээ. 2024 оны нэгдүгээр улирлын шалгалтад улсын хэмжээнд 4259, үүнээс Сүхбаатар аймагт 83 иргэн оролцохоор бүртгүүлсэн байна.
Төрийн албаны зөвлөлийн Сүхбаатар аймаг дахь салбар зөвлөл тус шалгалтыг аймгийн Засаг даргын Тамгын газрын хурлын танхимд 4 ээлжээр амжилттай зохион байгуулав. ТАЗ-ийн СБ аймаг дахь салбар зөвлөлийн гишүүн бөгөөд АИТХ-ын ажлын албаны дарга А.Чулуунбат шалгалт зохион байгуулахад оролцлоо.
Ерөнхий шалгалтад 83 иргэн бүртгүүлснээс 61 иргэн хамрагдаж, ирц 73,49 хувьтай. Үүнээс ерөнхий мэдлэгийн шалгалтад 28 иргэн, монгол хэл бичиг 23 иргэн, дүн шинжилгээ хийх чадвар 8 иргэн тус тус тэнцсэн байна. Тодруулбал нийт оролцогчдоос 8 иргэн буюу 13,11 хувь нь ерөнхий шалгалтад тэнцэж төрийн албаны нөөцөд бүртгэгдлээ.
