2022 онд ашиглалтад орсон шинэ музейн хувьд их хаан, түүний голомт нутаг дахь залгамжлагчид танхим, байгалийн өвийн танхим, угсаатны зүй, соёлын биет бусын өвийн танхим, шашин, дүрслэх урлагийн зэрэг 6 танхим 2000 гаруй үзмэр эд өлгийн зүйлээс бүрджээ. Үүний 400 гаруй үзмэр нь одоогоор дэглэгдээд байгаа юм.
Үүнээс дурдвал, Монгол Улсын хосгүй үнэт үзмэр халхын Сэцэнханы тамга хайрцгийн хамт, мөн халхын Сэцэнхан аймгийн угсаа залгамжилсан Сэцэн хануудын үе дамжин эдэлж хэрэглэж ирсэн эдлэл хэрэглэлүүд, халх даяар алдартай хурдан хүлгүүдийг бий болгосон Хардэл Жанжин бэйс, Хүлэг шинжээч, Өвгөн ноён М.Пүрэвжавын эд зүйлс, түүний хялгасан бийрээр зурж үлдээсэн хурдан хүлгүүдийн зураг, ХХ зууны алдарт уран дархан Тожил хийцийн эд зүйлс, тус аймагт оршин суудаг Халх, Буриад, Хамниган угсаатны ахуй соёлыг харуулсан угсаатны зүйн үзмэрүүд, ховор ном судар, бурхад зэрэг түүх, соёлын дахин давтагдашгүй дурсгалууд музейн сан хөмрөгт хадгалагдаж байна.
Тиймээс Хэнтий аймгийн шинэ музейг зорин очиж үүх түүх, нутгийн онцлог, соёлыг агуулсан үзмэрүүдтэй танилцаж нүдээ баясгаарай.
Хэнтий аймгийн музейн танхимуудад түүх археологи, угсаатны зүйн ховор эд өлгийн зүйлс их бий. Үзүүштэй музей шүү. Ажлын амжилт хүсэе.