Хэнтий аймаг өнгөрөгч 2022, 2023 оныг “Хүүхдийн хөгжил-хамгааллын жил” болгон зарлаж нийт 59 арга хэмжээг хэрэгжүүлэхээр төлөвлөгөө баталж байжээ. Энэ хүрээнд 175 сая төгрөгийг орон нутгийн төсөвтөө ч тусгуулан хүүхдийн эрхийг хангах, урьдчилан сэргийлэх болон сургалт нөлөөллийн арга хэмжээнүүдийг шат дараатай зохион байгуулж давхардсан тоогоор 42527 хүнд хүрч ажилласан байна. Үүний үр дүнд насанд хүрээгүй хүүхдийн гэмт хэрэг 40.5 хувиар буурсан бол хүүхдэд ээлтэй байдлын ерөнхий индекс 5.79 байгаа нь суурь түвшнээс 0.14-өөс өссөн үзүүлэлттэй гарчээ.
Тэгвэл зорилтот жилийн хүрээнд яг юу хийсэн бэ?
- Сар бүрийн 1-ний өдрийг хүүхдээ сонсдог өдөр болгожээ. Үүний хүрээнд сум бүр 82 удаагийн уулзалт зохион байгуулж 2500 орчим хүүхдийг хүлээн авч уулзсан бөгөөд үүнээс гарсан санал санаачилгын 92 хувийг шийдвэрлэсэн байна.
- Мөн сар бүр ГБХЗХГ-аас мэргэшсэн лекторуудыг урьж 10 мянга гаруй хүүхэд, 2000 гаруй эцэг эхчүүдэд эерэг хандлага харилцаа, гэр бүлийн үнэ цэн, амьдрах арга ухааны талаар лекц зохион байгуулжээ.
- 25 сургуулийн 3400 орчим сурагчдыг сэтгэлзүйн оношилгоонд хамруулсан.
- Аймгийн ГБХЗХГ-аас 15 сумын 3500 орчим иргэнийг явуулын сэтгэл зүйн үйлчилгээнд хамруулж, сэтгэл заслын үйлчилгээ шаардлагатай 776 хүхэд, кейс нээж ажиллах шаардлагатай 20 хүүхдийг илрүүлэн анхааралдаа авсан байна.
- Өсвөр насны хүүхдийг хорт зуршлаас урьдчилан сэргийлэх зорилгоор АДБХХЧ-ын “Хортой ус” дуулалт жүжгийг олны хүртээл болгож 600 гаруй хүүхдэд толилуулжээ.
- Гэр бүлийн зөрчилтэй 30 өрхийн 80 иргэнийг “Гэр бүлийн цогц сэтгэл зүйн үйлчилгээ”-нд вакум хэлбэрээр хамруулж, 60 хүүхдэд арт терапи буюу урлагийн сэтгэл заслын 24 цагийн үйлчилгээ үзүүлсэн байна.
- “Хөдөлмөр зуслан”-ийн хувилбарт үйлчилгээнд 144 хүүхдийг хамруулсан.
- Нэгдсэн эмнэлгийн төрөх тасгийн нярайн эрчимт эмчилгээний тасгийг тохижуулж, эх хүүхдэд ээлтэй орчинг бүрдүүлжээ.
- Хүүхдийн орчны эрсдэлийн үнэлгээг 8 сум хийж, 39 эрсдэлийг арилгаж, хувь хүний эзэмшлийн эрсдэлтэй объектод засаг даргын мэдэгдэл хүргүүлэн ажиллаж байна.
- Хүүхдийн оролцооны байгууллагын хүүхдүүдэд уулзалт хийх, сургалт хэлэлцүүлэг зохион байгуулах танхимыг тохижуулж, тоног төхөөрөмжөөр хангах зэрэг онцлох ажил, арга хэмжээнүүдийг зохион байгуулжээ.
