Энэ жил Монгол улсад “Шинжлэх ухааны үндэслэлтэй мал эмнэлэг, үржлийн алба” үүсэж хөгжсөний түүхт 100 жилийн ой тохиож байна. Үүнтэй холбоотойгоор ХХААХҮЯ-аас 100 бүтээлч ажлыг сар бүр зохион байгуулахаар төлөвлөсөн бөгөөд үүний нэгээхэн хэсэг нь 21 аймгийн Улсын аварга малчдын туршлага солилцох аялал юм. Тодруулбал 8 дугаар сарын 21-24 ний хооронд аймаг бүрийн төлөөлөл болсон 30 гаруй улсын аварга малчид туршлага солилцохоор Хэнтий, Сүхбаатар аймгийг зорин ирж байна.
Тэд аяллынхаа эхэнд Өлзийт тосгонд үйл ажиллагаа явуулдаг “М-АГРО” ХХК-ийн хэрэгжүүлж буй “МЭТАГРО” хөдөө аж ахуйн цогц төсөл болон эрчимжсэн мал аж ахуйтай танилцлаа. Ингэснээр малыг зах зээлд нэвтрүүлж, хэрхэн үр ашгийг нь хүртэх, эрчимжсэн мал аж ахуйг эрхлэхэд юун дээр анхаарах зэрэг талаар судлах зорилготой юм. Мөн Баянхутаг сумын харьяат, МУ-ын гавьяат малчин Б.Туяа аварга малчдыг хүлээн авч өөрийн орон нутгийн бэлчээрийн онцлог болоод мал маллах арга ухаан, туршлагаасаа танилцууллаа.
Үүний дараа Сүхбаатар аймгийн улсын аварга малчдын нэгдэж, улсдаа анх удаа үүсгэн байгуулаад буй “Улсын аварга малчдын холбоо”-ны үйл ажиллагаатай танилцах аяллаар ийнхүү үргэлжлүүлэх бөгөөд тэд энэ хугацаанд танилцсан, судалсан бүхнээ өөр өөрсдийн нутаг орондоо танилцуулж, хэрэгжүүлэх юм байна.
