Өмнөдэлгэр сумын харьяат, малчин Н.Найдан хоёр дахь жилдээ Нүүдэлчин фестивальд оролцож байна. Тэрээр 20 гаруй жил мал маллаж байгаа бөгөөд багаасаа л гар урлал тэр дундаа ширмэл, ширдэг эсгий урлалын бүтээл хийдэг байжээ.
Энэ жил түүний хувьд 3 жилийн хугацаанд оёж, урласан “Монголын нэг өдөр” бүтээлээрээ Нүүдэлчин-2023 фестивальд оролцож байна. Тодруулбал Монголын уран зураач Б.Шаравын “Монголын нэг өдөр” зургийг зээгт ширмэл оёдлоор оёж эсгий дээр буулган, таван ханатай гэрийн хөшгийг хийж урлажээ. Тус бүтээлээ тэмээний зогдрыг ээрч гаргаж авсан 5300 метрийн утсаар гурван жилийн хугацаанд урласан байна. Тэрээр энэхүү бүтээлээ 85 сая төгрөгөөр үнэлжээ.
Түүний нөхөр Н.Чулуунбат мөн адил тус фестивальд хоёр дахь жилдээ оролцож байгаа бөгөөд байгалийн аясаар ургадаг битүү модоор урласан сувенир, модон урлалаараа орж байна.
