Булган аймгийн Засаг даргын “Булганы сэргэлт” үйл ажиллагааны хөтөлбөрийн хүрээнд сургуулийн өмнөх боловсролд STEAM хөтөлбөрийг үе шаттайгаар нэвтрүүлэн хэрэгжүүлж байна. Тус хөтөлбөрийн хүрээнд бага насны хүүхдүүдийг шинжлэх ухаанч сэтгэлгээтэй, бүтээлч, асуудал шийдвэрлэх чадварт суралцахад нь дэмжлэг үзүүлэх зорилго бүхий “BULGAN GREEN MECH-2026” ШИМТ олон улсын тэмцээний II шат буюу аймгийн аварга шалгаруулах тэмцээн амжилттай зохион байгуулагдаж өндөрлөлөө.
Энэхүү тэмцээнд 9 багийн 36 хүүхэд, 18 багш оролцож, удирдамжийн дагуу төсөлт бүтээл хийж мэдлэг, ур чадвараа сорин өрсөлдсөн юм. Оролцогч багууд өгөгдсөн сэдвээс сонгон бүтээлээ хийж, багаар ажиллах ур чадварт суралцан, тулгамдсан асуудлыг дэвшүүлж, шийдвэрлэх арга замаа тодорхойлон, инженерчлэлийн шийдлээр загварын уялдаа, тогтвортой байдлыг харуулж, бүтээлээ тайлбарлан танилцуулснаараа онцлог байлаа.
Тэмцээнд багийн зохион байгуулалт, авхаалж самбаа, уран сэтгэмж, ур чадвараараа манлайлсан Хангал сумын Хүүхдийн цэцэрлэгийн баг тэргүүлж, улсын аварга шалгаруулах тэмцээнд оролцох эрхээ авлаа.
I байр: Хангал сумын Хүүхдийн цэцэрлэг
II байр: Булган сумын II цэцэрлэг
III байр: Булган сумын VII цэцэрлэг тус тус шалгарлаа.
