ЖДҮГ-ын Зээл, төслийн газрын дарга Н.Энхтөр орон нутагт томилолтоор ажиллаж байгаа бөгөөд Дорнод аймгийн Халхгол суманд өрхийн, ЖДҮҮ эрхлэгчидтэй уулзалт зохион байгууллаа. Уулзалтын үеэр Жижиг, дунд үйлдвэр, үйлчилгээг дэмжих тухай хуулийн нэмэлт, өөрчлөлтийн төсөл, мөн салбарын яамнаас хэрэгжүүлж буй “Орон нутгийн хөгжлийн төв”-ийн төсөл зэрэг бодлогын арга хэмжээний зорилго, ач холбогдол, иргэд болон бизнес эрхлэгчдийн үйл ажиллагаагаа өргөжүүлэх боломжийн талаар дэлгэрэнгүй мэдээлэл өглөө.
Уулзалтыг тус сумын Жижиг, дунд үйлдвэрийг дэмжих төвд зохион байгуулж, 10 орчим бизнес эрхлэгч оролцон хууль тогтоомжийн хэрэгжилт, орон нутагт бизнес эрхлэхэд тулгарч буй бэрхшээл, асуудлуудын талаар нээлттэй санал солилцлоо.Бизнес эрхлэгчдийн зүгээс зээлийн шалгуур хэт өндөр, татварын ачаалал их, зээл, төсөл, хөтөлбөрийн талаарх мэдээлэл орон нутагт дутмаг зэрэг асуудлыг хөндөн санал бодлоо илэрхийллээ.
Мөн Бүсчилсэн хөгжлийн үзэл баримтлалын хүрээнд 21 аймгийн төв, 70 суманд Сум дундын хөгжлийн төв (Орон нутгийн хөгжлийн төв) байгуулахаар тусгасны нэг нь Халхгол сум юм. Тус төв нь иргэд, малчид, тариаланчдад бизнесийн зөвлөх үйлчилгээ үзүүлэх, мэдээлэл, сургалтаар хангах, арьс шир, түүхий эдийн анхан шатны ангилан ялгалт хийх, сүү, цагаан идээ боловсруулах бага оврын үйлдвэр байгуулах зэрэг цогц үйлчилгээг нэг дороос авах боломжийг бүрдүүлэх юм.
