Ардчилсан намын дарга О.Цогтгэрэлийн А1009 тушаалаар өнөөдөр Төрийн ордонд хуралдсан Үндэсний бодлогын хорооны ээлжит хуралдаан шийдэх асуудлаасаа илүү “шоу”-гаар дүүрэн болов.
Улсын дээд шүүхээс буцаасан Үндсэн дүрмийн зарим заалтыг хэлэлцэх ёстой ч хуралдааны гол “үзүүлбэрийг” Д.Мөнх-Эрдэнэ, Баянгол дүүргийн АН-ын дарга Т.Хаянхярваа нар үзүүлэв.
Хоёр тал бие биенээ “шээс, баасаар нь” дуудаж хэрүүл өрнүүлэн, бүр усны саваа шидэлцэн, гар зөрүүлж эхэлсэн нь хормын дотор сошиалд тархав. Журмын анд, Хууль зүйн сайд асан О.Алтангэрэл хүртэл хооронд нь орж салгах гэж явж харагдана.
Яг юуны төлөө нударга зөрүүтлээ муудсаныг мэдэхгүй ч Их эзэн Чингис хааныхаа мэндэлсэн өдөр Ардчилсан намынхны цус цөс нь хэт хөөрөө юм болов уу, даа. Уг нь улс төрийн бодлогын хурал хийхээр цугласан атал “бодлогогүй балласан” тулаан үзүүлэхээр шийдсэн бололтой. Чингис хааны гал голомтны өдөр удам судраа мандуулж, улс Монголоороо бахархах атал усны сав шидэлж, уруул шөрмөсөө сунгасан нь ёстой л бахархлын “шинэ жишиг” тогтоолоо гэлтэй.
