Монгол бахархлын өдрөөр Монголчуудын бичиг үсгийн түүхийг 600 жилээр урагшлуулж чадсан "Хүйс толгойн бичээс"-ийг ЮНЕСКО-д бүртгүүлсэн батламжийг Гадаад харилцааны сайд бөгөөд ЮНЕСКО-ийн Монголын үндэсний комиссын дарга Батцэцэгээс аймгийн Засаг дарга Д.Пүрэв-Очир гардан авлаа.
“Хүйс толгойн бичээс” нь Булган аймгийн Могод сумын "Хүйс толгой" хэмээх газраас олдсон юм. Мөн Монгол хэлний хамгийн эртний дурсгалыг 1224-25 оны “Чингисийн чулууны бичиг” гэж үзэж байсан бол түүнийг даруй 600 гаруй жилээр урагшлуулсан хүн төрөлхтний хэл, үсэг бичгийн судлал, түүний дотор Монгол хэлний түүхэн ач холбогдолтой дурсгал бол “Хүйс толгойн бичээс” билээ.
“Хүйс толгойн бичээс” нь 154 см өндөр, 41 см өргөн, 15 см зузаан хөшөөний хар саарал өнгийн боржин чулуун тэгш гадаргуу дээр 11 мөр Монгол хэлээр, Брахми үсгээр сийлсэн бичээстэй байдаг.
