Их эзэн Чингис хааны гал голомтыг сахин суугч Хан Хэнтийчүүд Монгол бахархлын өдрийг Чингисийн талбайдаа өргөн дэлгэр тэмдэглэн өнгөрүүлж байна.
Монгол Улсын Их Хурлын 2012 оны тогтоолоор жил бүрийн энэ өдрийг “Монгол бахархлын өдөр” хэмээн нэрлэж, Эзэн Чингис хааны мэндэлсэн өдөр хэмээн албан ёсоор тэмдэглэн ирсэн билээ.
Эзэн Чингис хаан бол Монголын эзэнт гүрнийг байгуулж, төр улсаа нэгтгэн төвхнүүлж, дэлхийн түүхэнд гүн ул мөрөө үлдээсэн аугаа их удирдагчдын нэг юм. Түүний мэндэлсэн өдрийг монголчууд эв нэгдлээ бэхжүүлж, түүх соёл, омогшил бахархлаа сэргээн дээдлэх зорилготойгоор тэмдэглэдэг уламжлалтай.
Хан Хэнтий аймгийн иргэд, байгууллагууд энэ өдрийг тохиолдуулан үндэсний өв соёлоо сурталчлах, ахмад буурлуудынхаа үгийг сонсох, хүүхэд залууст бахархалт түүхээ ойлгуулж таниулах олон арга хэмжээг тусгайлан зохион байгуулж байна.
