Хэнтий аймгийн ИТХ-ын зургаадугаар хуралдаанаар орон нутгийн хөгжлийг хүний нөөцөөр дэмжих зорилготой “Нутгийн ирээдүй” хөтөлбөрийг 100%-ийн дэмжлэгээр баталлаа. Уг хөтөлбөр 2025-2028 оны хооронд хэрэгжих бөгөөд аймгийн мэргэжлийн боловсон хүчний дутагдлыг шийдвэрлэх, залуусын боловсролд хөрөнгө оруулах, төрийн албан хаагчдыг чадавхжуулахад чиглэнэ.
Хөтөлбөрт их, дээд сургуулийн төгсөх болон төгсөхийн өмнөх курсын Хэнтий аймгийн харьяалалтай оюутнууд, төрийн албан хаагчид болон орон нутгийн байнгын оршин суугчид хамрагдах боломжтой бөгөөд гадаад, дотоодын богино болон дунд хугацааны сургалтад хамрагдах сонирхолтой иргэд мөн хамрагдаж болох юм.
Тэтгэлгийн дэмжлэгт сургалтын төлбөрийг шууд сургуулийн дансанд шилжүүлэх, оюутнуудад 100%, төрийн албан хаагчдад 50% хүртэлх дэмжлэг үзүүлэх, гадаадад суралцах тохиолдолд 5 сая төгрөг хүртэлх дэмжлэг багтаж байна.
Хөтөлбөрийн материалыг жил бүрийн 7-р сарын 30-ны дотор хүлээн авч, сонгон шалгаруулалтын явцад ярилцлага, голч дүн, ажилласан хугацаа зэргийг харгалзан үнэлэлт дүгнэлт өгнө. Тэтгэлэг авсан иргэд орон нутагтаа 5-8 жил ажиллах үүрэг хүлээнэ.
“Нутгийн ирээдүй” хөтөлбөр хэрэгжсэнээр хүний нөөцийн чанар сайжирч, залуусын боловсролд тэгш боломж олгож, орон нутгийн хөгжилд бодит дэмжлэг үзүүлэх юм.
