Монгол Улсын Шадар сайд, аймгийн Засаг даргатай байгуулсан хамтран ажиллах гэрээ, Онцгой байдлын газрын даргын баталсан удирдамжийн хүрээнд “Гамшгаас хамгаалах бэлэн байдлын улсын үзлэг” өчигдөр /2024.11.21/ Чингис хотод зохион байгуулагдлаа.
Үзлэгийг ОБЕГ-ын Ажиллагааны удирдлагын газрын дарга, Гамшгаас хамгаалах төлөвлөлт, улсын хяналтын хэлтсийн дарга Хурандаа Б.Мягмардорж удирдан явуулсан бөгөөд аймгийн Онгой комисс болон 11 алба, 24 мэргэжлийн ангийг хамруулан зохион байгуулсан юм.
Энэхүү үзлэгээр Мэргэжлийн ангийн шинэчилсэн дүрмийг таниулах, Гамшгаас хамгаалах орон нутгийн бие бүрэлдэхүүний мэдлэг ур чадвар, бэлтгэл бэлэн байдлыг нэмэгдүүлэх, удирдах бүрэлдэхүүний гамшгийн үед шийдвэр гаргах чадавхыг дээшлүүлэх, өгөгдсөн цагийн байдалд бодитоор хэрхэн ажиллах дадлага туршлага олгосноороо онцлогтой.
Аймгийн бие бүрэлдэхүүний хувьд гишүүдийн идэвх оролцоо хангалттай сайн байсан гэдгийг ажлын хэсгээс онцолсон юм. Үргэлжлүүлээд зарим сумдад үзлэг зохион байгуулагдах бөгөөд нэгдсэн дүнг 11 сарын 25-нд танилцуулахаар болжээ.
