УИХ-ын гишүүн М.Бадамсүрэн, аймгийн Засаг даргын үүргийг түр орлон гүйцэтгэгч Ш.Ёл нар БНСУ-ын Бусан Их Сургуулийн Эмнэлгийн дарга Чон Сон Үн тэргүүтэй төлөөлөгчдийг хүлээн авч уулзжээ.
Уулзалтын хүрээнд Дорнод аймаг дахь Бүсийн оношилгоо эмчилгээний төвд Бусан их сургуулийн эмнэлгийн алсын зайн оношилгооны төв нээлтээ хийлээ. Тус төвд үзлэг оношилгоо хийж эмчилгээ хийхээс гадна хагалгааны явцад БНСУ-ын Бусан Их Сургуулийн эмч нартай шууд холбогдон зөвлөгөө авах боломж бүрдэж хоёр улсын эмч мэргэжилтнүүд харилцан туршлага солилцож хамтын ажиллагаа өргөжиж байгаа юм.
Мөн энэ оноос хэрэгжүүлж буй “Эмчийн хөгжлийг дэмжих” төслийн хүрээнд БОЭТ-ийн мэс заслын тасгийн 4 их эмч БНСУ-ын Бусан их сургуулийн эмнэлэгт амжилттай суралцаж төгсөөд байна.
Уулзалтаар аймгийн удирдлагуудын зүгээс цаашид Бусан Их Сургуулийн Эмнэлэгтэй хамтран ажиллах саналаа танилцуулав. Үүнд :
- Эмч нараа үргэлжлүүлэн суралцуулж, харилцан туршлага солилцож, мэдлэг, ур чадварыг нь дээшлүүлэх,
- Иргэдийг алсын зайн оношилгооны төвд үнэгүй оношлуулах төслийг үргэлжлүүлж, цаашид оношлуулах хүсэлтэй иргэдийг 200 мянган вон төлөөд энэхүү үйлчилгээгээ авах боломжийг бүрдүүлэх,
- Манай улсад оношлох, илрүүлэх боломжгүй өвчтэй Зүүн бүсийн /Дорнод, Хэнтий, Сүхбаатар/ иргэдийг Бусан Их Сургуулийн Эмнэлэг рүү илгээж оношлуулж үзүүлэх, эмчлүүлэх боломжийг нээж хамтран ажиллах,
- БНСУ-ын анагаах ухаан, эмнэлгийн үйлчилгээ, эмнэлгийн менежмент хурдацтай хөгжиж байгаа туршлагаас нь Дорнод аймгийн эмнэлэг, эрүүл мэндийн салбарын удирдлагуудыг чадавхжуулах, туршлага солилцох, менежментийн арга барилаас нь суралцах зэрэг саналыг тавьж Бусан Их сургуулийн эмнэлгээс цаашид хамтран ажиллахаа илэрхийлэв.
