Хэнтий аймгийн Засаг дарга Ц.Чогсомжав өнөөдөр Цэнхэрмандал суманд ажиллалаа. Энэ үеэр төрийн албан хаагчдын төлөөлөлтэй уулзаж цаг үеийн талаар мэдээлэл өгч, тэдний санал хүсэлтийг сонслоо. Тухайлбал сэг зэмийн устгал, ой хээрийн түймрээс урьдчилан сэргийлэхэд авч хэрэгжүүлэх ажлууд, төрийн албан хаагчид руу чиглэсэн орон нутгаас хэрэгжүүлж буй ажил, арга хэмжээний талаар мэдээлэл өгсөн юм.
Мөн тэрбээр яриандаа аймгийн хэмжээнд өрнөж буй төрийн албан хаагчдын нийгмийн баталгааг хангах “Асуудлаас шийдэлд” хөтөлбөрийн хүрээнд хийгдэж байгаа ажлууд цаашлаад тус хөтөлбөрийг хэрэгжүүлснээр нэг албан хаагч, нэг байгууллагад хэрхэн нөлөөлж, ямар үр дүнд хүрэх талаар онцоллоо.
Энэ удаагийн уулзалт мэдээ мэдээлэл өгөхөөс илүүтэй албан хаагчдын болон байгууллагуудад тулгамдаж буй асуудлын талаар түлхүү сонсож, харилцан яриа хэлбэрээр өрнөлөө. Албан хаагчдаас ирсэн санал хүсэлтийг цаашид аймаг орон нутгаас анхаарч, шийдвэрлэх тал дээр ажиллана гэлээ.
Мөн ажиллах үеэрээ сумын ойн ангийн үйл ажиллагаатай танилцлаа. Цэнхэрмандал сумын ойн анги нь улсын хэмжээнд гурав байдаг ойн ангиудын нэг бөгөөд хоёр хүний орон тоотой үйл ажиллагаагаа явуулж байна. Тус ойн ангийн шинэ барилгын ажил үргэлжилж байгаа бөгөөд ирэх намар ашиглалтад орох аж. Харин ойн ангийн зүгээс “Тэрбум мод” үндэсний хөдөлгөөний хүрээнд таригдаж буй модыг хамгаалах хашаажуулалт болон усалгааны стандартын машин шаардлагатай байгаа талаар аймгийн даргад хүсэлт тавилаа.
Түүний дараа УИХ-ын гишүүн, Монгол улсын сайд, ОНБТСҮХ-ны дарга Б.Бат-Эрдэнэ, УИХ-ын гишүүн, ХХААХҮ-ийн сайд Х.Болорчулуун, Сангийн сайдын зөвлөх Х.Алтай нарын хамт “Шинэ хоршоо” хөтөлбөрийн мэдээлэл хүргэх зорилгоор Цэнхэрмандал сумын иргэд, хөдөлмөрчидтэй уулзалт хийлээ.
