УИХ-ын гишүүнээр хоёр ч удаа сонгогдож байсан Н.Номтойбаяр “Үндэсний эвсэл” байгуулж, тэргүүнээр нь ажиллаж байгаа. 2024 оны УИХ-д сонгуульд оролцохоор мөрийн хөтөлбөрөө Үндэсний аудитын газарт ч хүргүүлээд амжсан бөгөөд сонгуулийн өмнө 21 аймгийн иргэдтэй уулзалт хийж байна.
Тэгвэл өчигдөр буюу 3 дугаар сарын 28-ны өдөр Хэнтий аймгийн иргэдтэй гурван талт нээлттэй уулзалтыг зохион байгууллаа. Уулзалтаар иргэдийн санал хүсэлтийг сонсож, орон нутгийн сэтгүүлчдийн асуултад хариулахын зэрэгцээ баримталж буй үзэл баримтлал, цаашид хийх ажлууд, мөрийн хөтөлбөрийн агуулга зэргээс цухас дурдсан юм.
Мөн тэрбээр яриандаа“Үндэсний эвсэл нь:
– Үндэсний ардчилсан үзлийг удирдлага болгон
– Улс төрийн талцал, намчирхлыг таслан зогсоож
– Төрийн эрх мэдлийг нэг улс төрийн намд төвлөрөхөөс сэргийлж, тэнцвэрийг сахиж, эвийг эрхэмлэн
-Үндэсний үйлдвэрлэлээ дэмжих замаар Монгол эх орныхоо язгуур эрх ашиг, эдийн засгийн аюулгүй байдлыг хамгаалж үндэстнээрээ амар амгалан, баян чинээлэг амьдрахыг эрхэм болгоно” гэдгийг онцлон хэлж байлаа.
Сонордуулахад тус эвсэл нь “Иргэн баян бол улс баян” хэмээх Үндэсний ардчилсан үзлийг суурь зарчим болгон “Үндэсний үйлдвэрлэлээ дэмжье, үндэстнээрээ баяжъя” мөрийн хөтөлбөрөө боловсруулжээ.
